भांगरभूंय | प्रतिनिधी
जांवयाक अटक; फाटीर, गुप्त भागार मारपेट
म्हापशें: घर जांवयाक घरांतल्यान वच म्हूण सांगपी जाण्ट्या मांवाक मारपेट करून जिवेशी मारपाची घडणूक कांसवाडो, थिये घडली. ह्या प्रकरणांत कोलवाळ पुलिसांनी दुबावीत जांवय जोनिटाेन डिसोझा (39) हाका अटक केल्या. डेनीस पॉल डायस (64) अशें मरण आयिल्ल्या मांवाचें नांव आसा.
ही घडणूक शेनवारा 3 वेर रातच्या 9.45 वरांच्या सुमाराक घडली. दुबावीत आरोपी आपली घरकान्न आनी ल्हान भुरग्या सयत मावोड्या रावतालो. जाल्यार ताचो मांव मयत डेनीस आनी ताची घरकान्न रावताली.
मयत डेनीस दुबाविताक आपल्या घरांतल्यान वचपाक सांगतालो. ताका लागून तांचे मदीं सद्दां झगडीं जातालीं. घडणुकेच्या दिसा मयत डेनीस सोरो पियेवन घरा आयिल्लो. घरा येतकूच दुबाविता कडेन झगडीं करूंक लागलो. तेन्ना दुबावितान ताच्या कानसुलार मारिल्ल्यान तो सकयल पडलो, आनी बेशुद्ध जालो. रोखडोच ताका म्हापशेंच्या जिल्हो हॉस्पिटलांत दाखल केलो तेन्ना दोतोरांनी ताका मरण आयिल्ल्याचें जाहीर केलें.
घडणुकेची म्हायती मेळटकूच पुलिसांनी पंचनामो केलो आनी दुबाविताक ताब्यांत घेतलो. आयतारा सकाळीं मयताचे कुडीचेर गोमॅकाँत मरणा उपरांतची तपासणी केली.
त्या वेळार मयताच्या कुडीच्या फाटीर आनी गुप्त भागार मारपेट जाल्ल्याचें दिसून आयलें. ह्या अहवालाच्या आदारान पुलिसांनी दुबाविता आड भादंसंच्या 302 कलमा खाला गुन्यांव नोंद केलो आनी ताका अटक केली. दुबावीत आरोपीक म्हापशें न्यायालयान 4 दीस पुलीस कोठी दिल्या. फुडलो तपास वरिश्ठ अधिकाऱ्यांच्या मार्गदर्शना खाला पुलीस निरिक्षक सोमनाथ माजीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
