त्रिदिब चौधुरींच्या ‘सालाझाराचे बंदखणींत 19 म्हयने’ पुस्तकाचें फाल्यां प्रकाशन
भांगरभूंय | प्रतिनिधी
मूळ बंगालींतलें दुर्मीळ पुस्तक येता कोंकणींत
पणजी, प्रतिनिधी ः मूळ बंगालींतल्या कोंकणींत अनुवादित केल्ल्या ‘सालाझाराचे बंदखणींत 19 म्हयने’ ह्या दुर्मीळ पुस्तकाचें प्रकाशन डॉ राममनोहर लोहिया हांच्या ५६ व्या पुण्यतिथी दिसा निमतान फाल्यां बिरेस्तारा १२ ऑक्टोबराक साडेचारांक मडगांवच्या रवींद्र भवनांत जातले. गोंयाखातीर काल मेरेन अनभिन्न आशिल्ल्या ह्या पुस्तकाच्या अनुवादाक लागून गोंयच्या स्वातंत्र्य संघर्शाच्या इतिहासांत एक मोलादीक भर पडटली. नामनेचे समाजशास्त्रज्ञ आनी शिक्षणतज्ञ डॉ. नारायण देसाय हांणी हें पुस्तक मूळ बंगालींतल्यान अणकारीत केलां आनी नवी दिल्लीचे डॉ. राममनोहर लोहिया रिसर्च फावंडेशनान उजवाडाक हाडलां.
वट्ट 404 पानांचें हें पुस्तक सेगीत सात फावटीं खासदार म्हणून वेंचून आयिल्ले मार्क्सवादी विचारवंत त्रिदिब चौधुरी हांणी बरयलां. जुलय 1955 वर्सा सत्तरी तालुक्यांतल्या भिरोंडा गांवांतल्यान गोंयांत प्रवेश केल्ल्या सत्याग्रहींच्या पंगडाचें फुडारपण चौधुरी हांणी केलें. ते खातीर पुर्तुगेज साम्राज्यान तांकां 12 वर्सां बंदखणीची ख्यास्त फर्मायली. ती मेळपी ते एकमेव खासदार.
बंदखणींतल्या डायरी सारकें आशिल्लें हें पुस्तक गोंय मुक्त जावचे एक वर्स आदीं 1960 वर्सा बंगाली भाशेंत उजवाडाक आयलें. गोंयच्या स्वातंत्र्य संघर्शाच्या चित्तथरारक अणभवां वांगडाच चौधुरी हांणी ह्या पुस्तका वरवीं त्या काळांतल्या राश्ट्रीय आनी आंतरराष्ट्रीय राजकारणाचो वस्तुनिश्ठपणान नियाळ केला. तशेंच, गोंय संघर्शा विशीं जायत्यो गैरसमज पातळावपाचे फाटभुंयेर ह्या पुस्तकांतल्यान खरी परिस्थिती उक्ती जाता.
कार्यावळीचे अध्यक्ष वरिश्ठ समाजवादी लोहियावादी फुडारी आनी आदले खासदार 73 वर्सां पिरायेचे के. सी. त्यागी आसतले. मार्क्सवादी विचारवंत बेळगांवचे निवृत्त प्राचार्य प्रा. आनंद मेणसे मुखेल सोयरे आसतले. तांणी आयज मेरेन 12 पुस्तकां बरयल्यात, तातूंतले एक पुस्तक गोंयच्या स्वातंत्र्य लढ्यांत कम्युनिस्टांच्या सहभागाचेर आसा. तांचे बापूय कृष्णा मेणसे हे गोंय मुक्तीचे एक अग्रणी फुडारी आशिल्ले.
इतिहास संशोधक, स्तंभलेखक, स्वातंत्र्य झुजारी अॅड लुईस मेंडीस हांचे चली डॉ. सुशिल मेंडीस ह्या पुस्तकाचेर उलयतली. डॉ नारायण देसाय बंगालींतल्यान कोंकणींत अणकार करपाचो अणभव सांगतले. पत्रकार आनी स्वातंत्र्यसैनिक पालकांचे पूत संदेश प्रभुदेसाय हांणी ह्या कोंकणी पुस्तकाची प्रस्तावना बरयल्या.
नवी दिल्लीच्या डॉ राममनोहर लोहिया रिसर्च फावंडेशनाचे अध्यक्ष आनी वरिश्ठ पत्रकार अभिषेक रंजन सिंग हांणी 63 वर्सां आदीं बरयल्ल्या ह्या पुस्तकाचे आतां मेरेन इंग्लीश, हिंदी आनी आतां कोंकणी अणकार उजवाडाक हाडल्यात. हाचे भायर डॉ. लोहियान बरयल्ल्या ‘अॅक्शन इन गोवा’ आनी ‘द स्ट्रगल ऑफ सिव्हिल लिबर्टीस’ ह्या दुर्मिळ पुस्तकांचे अणकार वेगवेगळ्या भारतीय भाशांनी उजवाडाक आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
