भांगरभूंय | प्रतिनिधी
पणजी, प्रतिनिधी : तिसरो जिल्हो जालो जाल्यार मुख्यालय तशेंच सरकारी कार्यालयां खातीर कुर्टी – फोंड्यां सरकारी जमीन आसा. तिसरो जिल्हो फोंडें म्हाला सयत धारबांदोडें, सत्तरी म्हालांतल्या लोकां खातीर सोयीचो थारतलो, अशें शेतकी मंत्री रवी नायक हांणी म्हणलां.
पयली आमदार आसतना रवी नायक हांणीच विधानसभेत तिसऱ्या जिल्ह्याची मागणी केल्ली. आतां सरकारान अभ्यासा खातीर समिती स्थापन केल्या. ती तीन म्हयन्यात सरकाराक अहवाल सादर करतली. समिती स्थापन करपाच्या निर्णयाक मंत्री रवी नायक हांणी येवकार दिला.
सध्या उत्तर गोंय आनी दक्षीण गोंय हे दोन जिल्हे आसात. मोले, धारबांदोडें, शिरोडें, पिरवळाच्या लोकांक सरकारी कामां खातीर मडगांवां वच्चें पडटा. तिसरो जिल्हो जालो जाल्यार फोंडें वा लागच्या वाठारात मुख्यालय तशेंच सरकारी कार्यालयां जातलीं. मोलें, धारबांदोडें, फोंडें, शिरोडें हांगाच्या सगळ्या लोकांक ही सुवात सोयीची थारतली. मुख्यमंत्री डॉ. प्रमोद सावंत हांणी जमनीची पळोवणी केल्या. धारबांदोडें जाल्ले कार्यावळींत हाचे पयलीं तिसरो जिल्हो करपाचें उतर मुख्यमंत्री सावंत हांणी दिल्लें. हे प्रमाण तांणी आतां तिसऱ्या जिल्हाची कार्यवाही सुरू केल्या. गरीब लोकांक मडगांव वा पणजे फावटी मारच्यो पडटात. तांकां तिसऱ्या जिल्याचो लाव जातलो, अशें मंत्री नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
