भांगरभूंय | प्रतिनिधी
म्हापशें, प्रतिनिधीः तिळारी धरणाच्या कालव्याचें दुरूस्ती काम सुरू आशिल्ल्यान बार्देस आनी पेडणें म्हालांतल्या जलशुद्धीकरण प्रकल्पांतल्यान उदकाची पुरवण बंद केल्या. अस्नोडें प्रकल्प पार न्हंय, जाल्यार आमठाणे धरण आनी चांदेल प्रकल्प बैलपार न्हंयच्या उदकाचेर सुरू आसा. मात पुरायेन तिळारी धरणाचेर निंबून आशिल्लो पर्वरी प्रकल्प बंद केल्ल्यान पर्वरी दिसाक अमक्याच वेळा खातीर उदकाची पुरवण करता.
दर वर्सा प्रमाण तिळारी धरण उदकास्रोत विभागान कालव्याच्या दुरूस्तीचें काम हातांत घेतलां. ताका लागून फाटल्या १३ नोव्हेंबर सावन ह्या धरणाच्यान बार्देसांतल्या अस्नोडें आनी पर्वरी आनी पेडणेंच्या चांदेल ह्या उदका शुद्धीकरण प्रकल्पांक जावपी उदका पुरवण बंद केल्या. सुमार देड म्हयनो ही उदकाची पुरवण बंद आसतली.
सध्या राज्य उदकास्रोत खात्यान चांदेल जलशुद्धीकरण प्रकल्पाक बैलपार न्हंयत जाल्यार अस्नोडें प्रकल्पाक पार न्हंय आनी आमठाणे धरण्याच्या कच्चा उदकाची जोडणी दिल्या. ह्या दोनूय प्रकल्पांतल्यान बार्देस आनी पेडणें म्हालांतल्या नळांक उदकाची पुरवण करतात. पूण पर्वरीचो १५ एमएलडी तांकीचो प्रकल्प पुरायेन तिळारी धरणाचेर निंबून आसा. उदकाची पुरवण उणी जाल्ल्यान हो प्रकल्प बांदकाम खात्याक सध्या बंद करचो पडला. तिळारीचें उदक पयलीं वरीं जाल्या उपरांतूच म्हळ्यार देड म्हयन्या उपरांत हो प्रकल्प परत सुरू करतले.
सध्या अस्नोडा जलशुध्दीकरण प्रकल्पाक आमठाणे धरण आनी पार न्हंयच्यान जाल्यार चांदेल प्रकल्पाक बैलपार न्हंयच्यान उदक दितात. पूण पर्वरी जलशुध्दीकरण प्रकल्प पुरायेन तिळारी धरणाचेर चलिल्ल्यान हो प्रकल्प बंद केला.ह्या दोनूय म्हालांनी सुरळीत उदका पुरवण दिवपाचो यत्न सुरू आसा., अशी म्हायती बांदकाम अधिकार्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
