भांगरभूंय | प्रतिनिधी
पणजीः ताळगांव पंचायतीच्या वेंचणुके खातीर राज्य वेचणूक आयोगान आरक्षणाची अधिसुचोवणी जारी केल्या. 11 वार्डांतले 6 वार्ड एसटी, ओबीसी आनी बायलां खातीर राखीव दवरल्यात. एप्रीलाच्या 28वेर ताळगाव पंचायतीची वेचणूक जातली. ताळगांवचे प्रभाग क्रमांक 3, 4, 6 आनी 9 हे बायलां खातीर राखीव दवरल्यात, वार्ड क्रमांक 5 हो एसटी खातीर जाल्यार वार्ड क्र 1 हो ओबीसी खातीर राखीव दवरला. गोंय राज्य मागास वर्ग आयोगान दिल्ले आंकडेवारी प्रमाण प्रभागांचे आरक्षण जाला, अशें राज्य वेंचणूक आयुक्त रामानामुर्थी हांणी अधिसुचोवणेंत नमूद केला. काल पंचायत खात्यान अधिसुचोवणी काडून ताळगांव पंचायतीच्या इकराय प्रभागां खातीर 28 एप्रीलांक वेंचणूक घेवपाचे जाहीर केल्ले. तेच बरोबर राज्य वेंचणूक आयोगान ताळगांव पंचायतीच्या प्रभागांची फ़ेररचणुकेची नीमणी अधिसूचोवणीय जारी केल्या. वेचणुके खातीर उमेदवारी अर्ज भरपाची तारीख राज्य वेंचणूक आयोग जाहीर करपाचे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
