भांगरभूंय | प्रतिनिधी
दौलतराव हवालदार: बिंब अस्तुरी पुरस्कारान भोवमानीत
पणजी: डॉ. मिनाक्षी मार्टिन्स ही अश्टताशी अस्तुरी. तांणी चळवळींत काम केलां. नाटकांनी, सिनेमांनी अभिनय करून नामना मेळयल्या अशें उलोवप आदले आयएएस अधिकारी आनी व्यासंगी वाचक दौलतराव हवालदार हांणी केलें.
पाटो पणजे संस्कृती भवनांत डॉ. मिनाक्षी मार्टिन्स हांकां बिंब प्रकाशनाचो बिंब अस्तुरी 2023 पुरस्कार दौलतराव हवालदार हांचे हस्तुकीं भेटयलो. ह्या वेळार डॉ. प्रमोद साळगांवकार, प्रशांती तळपणकार, प्राचार्य डॉ. भूषण भावे, जिनो फर्मास्युटिकल्सचे वेवस्थापकी संचालक दिलीप साळगांवकार, बिंबचे संपादक दिलीप बोरकार हाजीर आशिल्ले.
जिणेंत खूब चळवळी केल्यो. देंवती, चडटी पळयली. आमचो काळ गेलो. आयचे पिळगेच्यो आवडी वेगळ्यो आसात. आमी शेतांतूय काम केलां. क्रिस्तांव आसून लेगीत मराठी नाटकांनी काम करूंक लागलें तेन्ना खूबशा जाणांच्या मनांत प्रस्न उपस्थीत जाले. पूण म्हजे मराठी वाचन बरें आशिल्लें. हांव कला अकादमींत येसायेक वतालें तेन्ना सिनियर दोतोर म्हजे खातीर इंटरशीप ड्युटी करताले तें हांव विसरूंक शकना. मुखार सिनेमांनीय आंतरराष्ट्रीय पुरस्कर मेळ्ळे. आतां नव्या तरणाट्यांनी मुखार येवंक जाय अशें उलोवप डॉ. मिनाक्षी मार्टिन्स हांणी केलें.
मानसी धावस्कार हांणी मानपत्राचें वाचन केलें. दिलीप बोरकारान सुत्रसंचालन केलें.
अनुवादा बगर हेर भाशांतलीं संस्कृती कळना. ते खातीर संवादाचीय गरज आसा. अनुवादांत खूबशो नव्यो गजाली जोडूं येतात. केन्ना अनुवाद मूळ साहित्या परस बरो जाता. पूण ते करपाचेर आसता. पूण आमचे कडेन अनुवादकाक समाजीक प्रतिश्ठा उणी आसता. पूण अनुवाद जावंक नाशिल्ले साहित्य पांदर्यांतल्या सुकण्या भशेन आसता अशें दौलतराव हवालदार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
