भांगरभूंय | प्रतिनिधी
पणजी, प्रतिनिधी : राज्याच्या सात म्हालांतल्या नुस्तेमारांच्या घरांचें सर्वेक्षण डीजीपीएस पद्दतीन करपाचो निर्णय गोंय दर्यादेग वेवस्थापन प्राधिकरणान घेतला. डीजीपीएस सर्वेक्षण खासगी एजन्सी मार्फत जातलें. हाचे खातीर दर्यादेग वेवसथापन प्राधिकरणान निविदा मागयल्या.
बार्देश, फोंडें, पेडणे, तिसवाडी, साश्ट, काणकोण आनी मुरगाव ह्या म्हालांत सर्वेक्षण जातलें. दरेकी म्हाला खातीर वेगवेगळ्यो एजन्सी आसतल्यो. वॉर्डा प्रमाण सर्वेक्षण करचें पडटलें. खंयच्या वॉर्डांत नुस्तेमारांचीं कितलीं घरां आसात, ताची म्हायती ह्या सर्व्हे उपरांत मेळटली, अशें जीसीझेडएमएचे वांगडी सचिव डॉ. लेविन्सन मार्टिन हांणी सांगलें.
बार्देश म्हालात 83 वॉर्डांनी नुस्तेमारांचीं घरां आसात. हाका लागून 83 वॉर्डांनी डीजीपीएस सर्वेक्षण करचें पडटलें. फोंडें म्हालांत 12, पेडण्यां 15, तिसवाडी 22, साश्ट 44, काणकोण 47 आनी मुरगावच्या 34 वॉर्डांनी डीजीपीएस सर्वेक्षण जातलें. निविदा जारी जाले उपरांत वर्क ऑर्डर दितले. सर्व्हेचें काम 120 दिसांनी पुराय करचें पडटलें. सर्वेक्षणाचो सविस्तर अहवाल नुस्तेमारी खात्याक सादर करचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
