भांगरभूंय | प्रतिनिधी
बेळगांवी, खबरां संस्था : काळजाच्या आनी संबंदीत दुयेंसांच्या दुयेंती खातीर बेळगांवच्या अरिहांत हॉस्पिटलान काळजाची तपासणी आनी स्क्रिनींग पर्वरे आयोजीत केलां. काळजाचे सर्जन आनी हॉस्पिटलाचे वेवस्थापकीय संचालक डॉ एम डी दीक्षित आयज शेनवारा 7 ऑक्टोबर दनपारां 1 मेरेन गोवा स्कॅन सेंटर, पर्वरे तपासणी करतले. तशेंच सल्लोय दितले. हॉस्पिटलाच्या अधिकाऱ्यांनी ताचो फायदो घेवचो, असो उलो मारला.
डॉ. दीक्षित हे आंतरराष्ट्रीय नामनेचे काळजाचे शस्त्रक्रिया दोतोर आसात. वेगवेगळ्या आंतरराष्ट्रीय संघटनांचे ते मानादीक वांगडी आसात. कर्नाटक आनी गोंय वाठारांत रोबोटीक काळजाची शस्त्रक्रिया करपी ते पयले दोतोर.
“ काळजाच्या दुयेंसांतल्यान वचपी तरणाट्यांचो आंकडो भिरांकूळ रितीन वाडत आसा ही हुस्को करपा सारकी गजाल. मोबायलाच्या व्यसनाक लागून योग्य आहार ना, फावो तो व्यायाम आनी योग्य न्हीद नाशिल्ल्यान अशें जाता. ताण आनी मानसीक अस्वस्थताय लेगीत काळजाच्या दुयेंसांक जोडपाक लागल्या. तरणाट्या पिळगे मदीं काळजाच्या समस्यांची गंभीर वाड हो खोलायेन हुस्को करपाचें कारण आसा,” अशें डॉ दीक्षित हांणी सांगलें.
डॉ. दीक्षित हे 35 वर्सांचो अणभव आशिल्ले नामनेचे शस्त्रक्रिया वैज आनी तांणी 35 हजारां वयर यशस्वी शस्त्रक्रिया केल्यात. ते दुयेंतींची तपासणी करतले, देखून काळजाचे दुयेंस, छाती दुखप, बायपास शस्त्रक्रिया, काळजाच्या झडप दुयेंस, जन्मजात काळजाचो रोग, नवजात आनी भुरग्यांचो काळजाचो रोग, काळजांत बुराक आशिल्ले दुयेंती, स्वास घेवपाची समस्या आशिल्ल्या दुयेंतींनी तांच्या सल्ल्याचो फायदो घेवचो, अशें अरिहांत हॉस्पिटलांतल्या अधिकाऱ्यांनी आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
