भांगरभूंय | प्रतिनिधी
रस्तो विभागाच्या अभियंत्याच्या कॅबिनाक लायलें कुलप
काणकोण: श्रीस्थळ पंचायतीचे पंच वांगडी रामू उर्फ धिल्लन नायक हांणी आपल्या भाटपाळ प्रभागांतल्या रस्त्याचें डांबरीकरण करपाची मागणी खूबशे फावटी केल्ली. 24 एप्रील मेरेन ह्या कामाक सुरवात करात नाजाल्यार 26 वेर उपोशणाक बसपाची शिटकावणी दिल्ली. मदेकांत रस्तो विभागाच्या अभियंत्यांनी रामू नायक हांचे सयत भाटपाल प्रभागांतल्या रस्त्याची पळोवणी करून 6 मे मेरेन कामाक सुरवात करतले अशें आस्वासन रामू नायक हांकां दिल्लें अशें रामू नायक हांणी सांगलें. पूण रस्त्याच्या कामाक लागपी खडी आनी फातर हांगा हाडून उडोवंक नाशिल्ल्यान आपल्याक दिल्लें आस्वासन फट थारलें अशें दिशिल्ल्यान आपूण उपोशणाक बसला अशें रामू नायक हांणी सांगलें.
ते काणकोणच्या उपजिल्होधिकारी कचेरे कुशीक उपोशणाक बसल्यात.
रामू नायक हे उपोशणाक बशिल्ल्याची म्हायती मेळटकूच काँग्रेस पक्षाचेे फुडारी जर्नादन भंडारी आनी गोवा फॉरवर्ड पक्षाचे फुडारी विकास भगत हांणी रामू नायक हांकां आपलो तेंको दिलो. पूण रस्तो विभागाचे थळावे सहाय्यक अभियंते येवन तांणी रामू नायक हांची विचारपूस करूंक नाशिल्ल्यान जनार्दन भंडारी आनी विकास भगत आनी काँग्रेस कार्यकर्ते वैष्णव पेडणेंकार, क्लेस्टन व्हिएगश, वैशल पागी, सिद्धार्थ नायक आनी हेरांनी अभियंतो दिलीप केरकार हांकां घेराव घालून संबंदीत रस्त्याचें डांबरीकरण खंयच्या दिसा करतले हाचें लेखी आस्वासन दिवचें अशी मागणी केली.
केरकार हांणी ह्या रस्त्या संबंदी आपणे सगले तरेचो पत्र वेव्हार वरिश्ठां कडेन केला. कामाची निमाणी ऑर्डर मेळ्ळे उपरांत काम करतले अशें सांगलें.
पूण घेराव घाल्ल्यांनी लेखी आस्वासनाची मागणी केली. नाजाल्यार अभियंत्याच्या कॅबिनाक कुलप लावन बंद करपाची शिटकावणी दिली. सहाय्यक अभियंतो लेखी आस्वासन दिवंक शकूंक नाशिल्ल्यान निमाणें आंदोलनकर्त्यांनी सहाय्यक अभियंतो दिलीप केरकारा सयत नितीन देसाय हांकांय भितर बंद करून कुलप लायलें. निमाणें पुलिसांक आपयले उपरांत कुलप काडलें.
निमाणें सहाय्यक अभिंते केरकार, कनिश्ठ अभियंते सावंत, आंदोलन करपी हांणी उपोशणाक बशिल्ले रामू नायक हांचे कडेन चर्चा केली आनी आयज (बिरेस्तारा) रामू नायक हांचे सयत पणजी कचेरेंतल्या वरिश्ठ अधिकार्यां कडेन चर्चा करून डांबरीकरणाच्या कामा संबंदी उपाय काडपाचें आस्वासन दिले उपरांत रामू नायक हांणी आपलें उपोशण फाटीं घेतलें.
ह्या वेळार पुलीस निरिक्षक चंद्रकांत गांवस, उपनिरिक्षक रामचंद्र नायक पुलीस पंगडान सयत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
