भांगरभूंय | प्रतिनिधी
एसजीपीडीए मार्केटा भायर वचपाक पाडलें भाग
मडगांव: फातोड्ड्यां एसजीपीडीएच्या ठोक नुस्त्या मार्केटा भायर थारिल्ल्या वेळा उपरांत ठोक नुस्तें विकप्यांक एसजीपीडीएच्या कर्मचाऱ्यांनी किरकोळ नुस्त्या मार्केटांत वचून नुस्तें विकात अशें सांगलें, पूण किरकोळ नुस्तें विक्रेत्यांनी त्या विक्रेत्यांक विरोध करीत काल तांकां मार्केटा भायर वचपाक भाग पाडलें.
फातोड्ड्यां एसजीपीडीएच्या ठोक नुस्त्या मार्केटाचो मुद्दो सद्या चर्चेंत आसा. परंपरीक नुस्तें विक्रेत्यांक मार्केटा भायर बसूंक दिनात. ताका लागून तांचे कडल्यान योग्य सुवात उपलब्ध करची, अशी मागणी जाता. ठोक नुस्त्या मार्केट फांतोडेर 4 ते सकाळीं 10 वरां मेरेन सुरू दवरपाचो निर्णय जाला. उपरांत सगल्या विक्रेत्यांक थंय सावन वचपाक सांगतात. उपरांत कांय नुस्तें विक्रेते सुरावले रस्त्या कुशीक बसून नुस्तें विकतना दिसून येतात. जाल्यार कांय जाण नुस्तें घेवन परतून वतात.
ह्याच विक्रेत्यांक एसजीपीडीएच्या कर्मचाऱ्यांनी काल किरकोळ नुस्त्या मार्केटा भायर बसून वेवसाय करपाक सांगिल्लें. पूण किरकोळ नुस्तें विक्रेत्यांनी तांकां विरोध केलो. ठोक दरान नुस्त्याची विक्री केल्यार आमी कितें करतले असो प्रस्न करून त्या विक्रेत्यांक मार्केटा भायर वचपाक किरकोळ मार्केटांतल्या विक्रेत्यांनी भाग पाडलें.
किरकोळ नुस्तें विक्रेते संघटणेचे फेलिक्स गोन्साल्वीश हांणी दिल्ले म्हायती प्रमाण एसजीपीडीए कडल्यान थेट ठोक नुस्तें विक्रेत्यांक हांगा धाडप योग्य न्हय. तांकां मार्केटा भायर बसून नुस्तें विक्री करपाक सांगप हेंवूय चुकीचें आसा. एसजीपीडीएचे कचेरेंत वचून आयलों, पूण थंय कोणूच अधिकारी वा अध्यक्ष नाशिल्लो अशें तांणी सांगलें.
एसजीपीडीए कडल्यान ठोक नुस्तें विक्रेत्यांक हांगा धाडीत जाल्यार किरकोळ नुस्तें विक्रेत्यांचें नुस्तें कोण घेतलो, तांणी कसो वेवसाय करचो हो विचार करप गरजेचो आसा. हे विशीं एसजीपीडीएच्या अधिकाऱ्यां कडेन चर्चा करतले अशेंय गोन्साल्वीश हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
