भांगरभूंय | प्रतिनिधी
मुरगांव नगराध्यक्षाची तोखणाय; उबारिल्लें पाखें मातयेभरवण
वास्को: ठोक नुस्तें विक्रेत्यां आड कालूय (बुधवारा) कारवाय सुरू आशिल्ली. ठोक नुस्तें विक्रेत्यां मदल्या कांय जाणांनी तात्पुरत्या स्वरुपांत रस्त्याचे कुशीक उबारिल्लें पाखें मातयेभरवण केलें अशें मुरगांव पालिकेचे नगराध्यक्ष लिओ रॉड्रिगीश हांणी सांगलें. कांय ठोक नुस्तें विक्रेते सांजवेळा मुरगांव पालिका कचेरी बंद जाले उपरांत नुस्तें विकतात. तांचे आड कारवाय करपा खातीर पुलिसांक सुचोवणी केल्या अशें रॉड्रिगीश हांणी स्पश्ट केलें.
ठोक नुस्तें विक्रेत्यांकूय बुधवारा आपलो वेवसाय कांय काळा खातीर बंद दवरून मुरगांव पालिकेची कचेरी गांठली. पूण बुधवारा तांकां नगराध्यक्ष लिओ हांची भेट घेवन तांणी सुरू केल्ले कारवाये खातीर समाधान उक्तायलें. आमच्यो कांय मागण्यो तांचे मुखार दवरल्यात. ह्यो मागण्यो लिओ रॉड्रिगीश हेच पुराय करतले अशें तांणी स्पश्ट केलें.
रॉड्रिगीश हांणी सांगलें, नुस्तें विक्रेत्यांचे मागणे प्रमाण फाटले तीन दीस आमी ठोक नुस्तें विक्रेत्यांक नुस्तें विकपाक अडकाव केला. ते नुस्तें विकतना दिसून आयल्यार तांच्या दुकानांक कुलप लायतले अशी शिटकावणी दिल्या. ते खातीर ठोक नुस्तें विकप उणें जाला.
मजगतीं, कांय जाण पालिका कचेरी बंद जाले उपरांत नुस्तें विकत आशिल्ल्याचें नदरेक हाडून दिलें. ह्या प्रकरणांत आपूण पुलीस निरिक्षक कपील नायक हांचे कडेन उलोवणी केल्या. तांणी सांजवेळा ठोक नुस्तें विकप्यां आड कारवाय करपाचें आस्वासन दिलां. तेच प्रमाण नुस्तें विक्रेत्यांनी कांय मागण्यो केल्ल्यो. त्यो रोखड्योच सोडयतले. रस्त्याचे कुशीक कांय बायलां नुस्तें विकतात. तांकां थंयच्यान धांवडावन घाले उपरांत त्यो परतून येतात.
क्रिस्टोडियो डिसोझा हांणी समस्या मांडल्यो. मार्केटांतल्या शौचालयांतले नळ, बेसीन बी गजाली चोरयेक गेल्यात. ताची दुरुस्ती जावंक जाय. तशेंच थंय सुरक्षा रक्षक दवरचो. थंयचे तिजुले गुळगुळीत जाल्ल्यान मार्केटांत येवपी कांय गिरायक ताचे वयल्यान पांय घसरून सकयल पडटात. ताका लागून कांय जाण जखमी जाल्ल्याच्यो घडणुको घडल्यात. थंय दुसरे तिजुले बसोवचे अशी मागणी आमी केल्या अशें डिसोझान सांगलें.
तशेंच लिओ रॉड्रिगीश पयशे खातात अशें हांवें म्हणूंक नाशिल्लें. कांय जाणांचीं बोल्सां भरत आशिल्ल्यान ठोक नुस्तें विक्री बंद जायनाशिल्ल्याचें म्हणिल्ल्याचो दावो डिसोझान केलो. तांणी रॉड्रिगीश हांणी केल्ले कारवायेची तोखणाय केली. नुस्ते विक्रेत्यांचे प्रस्न लिओ रॉड्रिगीश सोडयतले अशी आमकां आस्त आसा अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
