भांगरभूंय | प्रतिनिधी
पणजी, प्रतिनिधी : बेकायदो पर्यटन गायड तशेंच टावटांचेर कारवाय करपा खातीर कायद्यांत दुरूस्तीची गरज आसा. मुख्यमंत्री डॉ. प्रमोद सावंत हांचे कडेन ह्या विशयाचेर चर्चा जाल्या, अशी म्हायती पर्यटन मंत्री रोहन खंवटे हांणी दिली.
बेकायदा टावटस न्हय तर वेश्या वेवसाय, दर्यादेगांचेर सोरो पियप हाचेर कारवाय जावपाक जाय. पर्यटना खातीर खासा पुलीस दळाची गरज आसा. पर्यटन कायदो पसून खर करचो पडटलो. सगळ्या समस्यांचेर चर्चा सुरू आसा, अशें पर्यटन मंत्र्यान सांगलें.
पर्यटन हंगाम सुरू जाला. दर्जेदार पर्यटक आयले, जाल्यार राज्याक येणावळ मेळटली. तशेच कायदो सुवेवस्था राखपाक मजत जातली. बेशिस्त पर्यटक आयले जाल्यार कायदो सुवेवस्थेचो प्रस्न निर्माण जावपाची भिरांत आसता. तशेच थळाव्या लोकांक तांचे पसून त्रास जावपाक जायना. वेश्या वेवसाय, दर्यादेगांचेर सोरो पियप, बेकायदा टावटस हांचेर कारवाय करपाचे आदेश पुलिसांक दिल्यात. पुलीस कारवाय करतात. तरी पुलिसांचो आकडो मर्यादीत आसा. अटक जाली तरी कायद्याक लागून खर कारवाय जाय ना. बेशिस्त पर्यटकांचेर नियंत्रण दवरपाक खर कायदो करपाक जाय. बेकायदा टावटसांचेर कारवाय सुरू जाल्या. तरी आजून ही समस्या सुटावी जावंकना.
येत्या 6 जुनाक राज्यभर व्हडा दबाज्यान छत्रपती शिवाजी महाराज राज्याभिशेक सुवाळो जातलो. हाचे पयली आध्यात्मिक पर्यटन सर्कीट तयार जातलें. आध्यात्मिक पर्यटनाक राज्यात वाव आसा. ताका उर्बा दिवपाचे नदरेन वाटचाल सुरू आसा, अशें पर्यटन मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
