जातीधर्माच्या नांवान राजकारण करचें न्हय

भांगरभूंय | प्रतिनिधी

फ्रान्सीस सार्दीन: बैल, रेडो, म्हस हांचे मास विक्रेक आक्षेप घेवचो न्हय

मडगांव: फोंडेंच्या हिंदू जनजागृती समितीचे बसकेंत हिंदूंक मतां दिवपाचें आवाहन केलां. गोंयांत हिंदू, मुस्लीम, क्रिस्तांव सगले भावपणाच्या नात्यान रावतात. धर्माच्या, जातीच्या नांवार कोणेंच राजकारण करचे न्हय. तशेंच बैल, रेडो, म्हस हांचे मास विक्रेक कोणेच आक्षेप घेवचो न्हय अशें आवाहन दक्षीण गोंयचे खासदार फ्रान्सीस सार्दीन हांणी केलें.

मडगांवां बुधवारा घेतिल्ले पत्रकार परिशदेंत ते उलयताले. सगल्या धर्माचे लोक आमकां जाय. ते खातीर बरे सरकारूय येवपाची गरज आसा. हेर पक्ष कितेंय सांगत आसले तरी फुडली वेंचणूक ही फक्त काँग्रेस आनी भाजप ह्या दोन पक्षांतूच जातली. गोंयांत जातीधर्माच्या नांवाचेर मतांचें राजकारण करचे न्हय अशें तांणी म्हणलें.

गोंयच्या सरकारी कचेऱ्यांनी आनी खाजगी आस्थापनांनी कंत्राटी कामगार घेतात. गोंयच्या तरणाट्यांक चड पगार दिवचो पडटा. ह्या कारणा खातीर खूबशे कडेन उण्या पगारांत काम करपी गोंया भायल्या लोकांची नेमणूक जाता. टपाल खात्यांतूय थळाव्यो सुवाती गोंयकार तरणाट्यांक मेळपाची गरज आसा. पांच वर्सां परस चड काळ काम केल्ल्या कामगारांक सेवेंत कायम करचे अशें सार्दीन हांणी म्हणलें.

आधार कार्डाच्या नुतनीकरणा खातीर आनीक दोन म्हन्यांचो वेळ दिवचो. लोकांक गरजे भायर रांगेंत उबे करून दवरचे न्हय अश्यो मागण्यो सार्दीन हांणी केल्यो.

फ्रान्सीस सार्दीन हांणी म्हणलें…

* रुमडामळ वाठारांतल्या प्रकारा उपरांत खूबशा लोकांनी म्हाका फोन केलो. गोंयांतूय अशे प्रकार सुरू जावप दुर्दैवी आसा. हिंदू, मुस्लीम, क्रिस्तांव सगल्या धर्माचे लोक गोंयांत रावतात.

* क्रिस्तांव आनी मुस्लीम हे बीफ खातात. पूण गोरवां सांबाळ खात्याचो मंत्री आसतना लोकांच्यो भावना समजून घेवन हांवें गायींच्या कत्तीलीचेर बंदी घाल्ली. आतां बैल, रेडो, म्हस हांच्या मासाची जी विक्री जाता ताचेर कोणेच आक्षेप घेवचो न्हय.

* रुमडामळ वाठारांत कोणूय बेकायदो काम करीत आसत जाल्यार ताचेर कारवाय करपाचो अधिकार हो संबंदीत खात्याक आसा. कोणूय येतात आनी कोणाच्याय नांवाचेर तोडफोड करतात.

* लोकांक जें अवैध दिसता तांणी संबंदीत खात्याक सांगचें. कायदो हातांत घेवचो न्हय. गोंय सरकारान हाची दखल घेवन रोखड्या रोखडी कारवाय करची आनी अशे प्रकार आडावचे.