चलात… सैम आमकां सादयता 

भांगरभूंय | प्रतिनिधी

चौकार

गौरांग बाबुराव भांडीये 

8552883808 

हो सैमूच आमचे जिणेक नवो आकार दिता. ताचे परस व्हडली देवता ना. फाल्यां संवसारीक पर्यावरण दीस. ते निमतान….

पर्यावरण हो मनीस जिणेचो प्राणभूत घटक. हो सैमूच आमचे जिणेक नवो आकार दिता, अशें म्हणल्यार अतिताय जावची ना. जरी आमी कितल्याशाच देवांक पुजले, तरी सैमा परस व्हडली देवता ना. हो संवसार जेन्ना आमी नियाळटात तेन्ना पर्यावरण आनी धरून आशिल्ल्या गजालींचो विचार म्हत्वाचो आसा. आमी संवसारीक पांवड्यार नदर मारीत जाल्यार कितल्योश्योच चळवळी सैमाच्या रक्षणा खातीर जाल्यात. लोक आपलें अस्तित्वूच जणू सैमान भरशिल्लें आशिल्ल्या प्रमाण सैमाचे साधनेंत मग्न जाल्ले आनी अजून आसात. कारण हें पाचवेंचार सैमूच आमचो एक नेत्रतृप्त श्वास. सैम ही देवता जाल्यार हे धर्तरे वयलो दरेक मनीस ताचो पुजारी आसा. दुर्दैवान, आयज सैमाचेर आयिल्ली मानवी हावळ सैमाचो अंश ना नपश्चात करपाक लागल्या.  

आयज संवसारांत सैमाचें लेगीत राजकारण जावपाक लागलां अशें म्हणल्यार अतिताय जावची ना. संवसाराच्या विंगड विंगड कोनशांनी सैमीक लडे पेट घेत आसात. झाडां-पेडां, जीव, जिवावळ आदी गजालींचेर हालीं काळार जावपी आघात हे विचारा पलतडचे आसात. सैमीक पांवड्यार ह्या संवसारांत सगळ्यांत गिरेस्त म्हणल्यार आमची जैवविविधताय. संवसारीक तज्ञांनी दिल्ल्या साबार अहवालां प्रमाण उपाट गतीन हीं विनाशाचीं कामां चालीक लागल्यांत. तशें पुराय जगभर सैमाच्या रक्षणा खातीर साबार मोहीम चलतात, साबार गट ह्या संरक्षणाच्या कामांत कार्यरत आसात. पूण हो लढो फक्त संघटणांचो न्हय, जाल्यार पुराय मनीस जातीचो. मनशांच्या एकत्रीकरणांतल्यान सगळ्या आडमेळींक आळाबंदाक हाडूंक जातात. आनी हीच नदर, होच विचार आमकां सैमा कडेन पळोवपाचो नवो दृश्टीकोन भेटयता.  

5 जून हो संवसारीक पर्यावरण दीस. सरकारी तशेंच बिगर सरकारी पांवड्यार लेगीत हो सुवाळो व्हडा प्रमाणान आनी उमेदीन मनयतात. जागतीक मळार म्हत्वाच्या दिसां भितर ह्या दिसाक लेगीत खाशेलें म्हत्व आसा. मुळांत ह्या दिसाचो थाराव 1972 वर्सा युनायटेड नेशन्साच्या एके परिशदेंत मान्य जाल्लो. दर वर्सा संवसारीक मळार विंगड विंगड देश ह्या दिसाचें येजमानपण स्विकारतात आनी पर्यावरणीय विशयांचेर साबार चर्चासत्रां, परिसंवाद तशेंच साबार येवजण्यो चालीक लायतात. भारतान 2011 आनी 2018 वर्सा हे बसकेचें आयोजन केलां. हे बसकेंतल्यान सैमीक विशयांचेर उलोवपाक एक माची फाव जाली. प्रदुशणां, प्लास्टिक, जनावरांची हत्या, उदक सारके विशय नांवां रुपाक आयले. हातूंतल्यान साबार देशां मदीं करार जाले जेणें करून एकठांय येवन हे गजालीचें सगळे जाण फुडारपण करतले. सातत्यान संयुक्त संघटना ह्या दिसाचें म्हत्व पटोवन दिता. पूण प्रस्न फक्त तांणी पटोवन दिवपाचो ना, जाल्यार आमकां तें पटलां का ना? वा आमी तें पटोवन घेतलां काय ना हो विशय म्हत्वाचो आसा. 

गोंयचे बाबतींत विचार करचो जाल्यार पर्यावरणाचो विचार व्हडा प्रमाणान चलता. पर्यावरणाच्या रक्षणा पासत गोंय सरकार तशेंच हेर लोक सातत्यान वावुरतात. हालीं तेंपार शेळ मेळावली, म्हादय सारके पर्यावरणीय विशय लोकांनी स्वतंत्र लढ्याचेर पेलल्यात. कारण ही सैम संपत्ती आमचे कडल्यान पयस गेली जाल्यार मनीस आपलें अस्तित्व वगडावन बसतलो. भारत तशेंच राज्य सरकारान हाची देख घेवपा पासत पर्यावरण मंत्रालयां, विभाग सुरू केल्यात. हातूंतल्यान समाजीक पांवड्यार बेस बरी जागृताय जाता. पूण आयची वास्तवीक परिस्थिती पळयत जाल्यार खूब जाणांनी ह्या गजालींतल्यान आपलें आंग काडिल्ल्याचें कळटा. 5 जून हो थाट जावन उरूंक ना न्हय? असो दुबाव मारता. 

आनीक एक विशय चिरंतराक पडटा तो म्हणल्यार उदरगत. जायते कडेन झाडां कापून रस्ते, घरां बांदप चालू आसा. कसलोच प्रकल्प जातलो वा उदरगतीक धरून जें कितें करतात तातूंत पर्यावरणाची हानी ही जातलीच. पूण ताचेर नियंत्रण दवरून कशे पद्दतीन कमीत कमी सैमाची राखण जातली हाचो पुर्वविचार जावपाक जा. सरकारी पांवड्यार नाका जाल्ले प्रकल्प येतात, तेन्ना आपली आपल्या भोंवतणच्या वाठारा कडली भुमिका मनशाक कळपाक जाय. पर्यावरणीय तज्ञ सातत्यान ह्या गजालींची माहिती दितात. पूण लोकांची वृत्ती आनी प्रवृत्ती हे गजालीक आडवाद थारता हें पळोवन दूख भोगता. 

आयज गोंयांत म्हादयचो विशय गाजता. खंय ना खंय आपल्या जिवनदायिनीक पावणेर काडिल्ल्यान पुराय गोंयांत वातावरण गरम जालां. सरकाराचें समर्थन हे गजालींत फाव तितलें मेळना. तशेंच मोलें अभयारण्याचो विशय होय लेगीत तितलोच ज्वलंत. उदरगत जावपाक जाय हें खरेंच. पूण ते उदरगतींत नाश कितलो आसा हेंय जाणा जावप गरजेचें. पूण सत्ते सामकार हें सगळें व्यर्थ वतना दिश्टी पडटा. समविचारी लोक आनी तांच्यो भावना लेगीत ह्या अच्छेवांत भरसल्यात. आश्वासनां आमकां फक्त थाकाय दीत आसात, निर्णय न्हय. 

आयचो तरणाटो हो आयच्या तशेंच फाल्यांच्या फुडाराचो अनुयायी आसतलो. आयज आमच्या भोंवतणी जें कितें घडटा, ताचो परिणाम येवपी काळांत दिसतलो. आमचें सैम हीच आमची खरी आस्पत. नव्यो नव्यो मोहिमी तयार करपा परस आसा तांचेंच पालन केल्लें चड बऱ्याचें थारतलें. तरणाट्यांनी ही जापसालदारकी व्हडा प्रमाणान घेवपाची गरज आसा. मुखेल म्हणल्यार युवा नेतृत्व राजकारणांत सरपाक जाय. पर्यावरण दीस हो 5 जूना पुरतोच न्हय जाल्यार ती एक सांखळ जावन चलपाक जाय. ह्या दिसांचें हालीं काळार उत्सवीकरण जायत आसा. हाचेर विचार जावप गरजेचें आसा. नेम, करार, भुमिका घेतली जाल्यार ताची अंबलबजावणी जावपाचेर लेगीत भर घालपाक जाय. ल्हानपणा सावन ‘झाड आमचे मायबाप, तोडू नका लागेल पाप’ हें शिकयतात. ताचें पारायण करप हो आमचें सैम आनी मानवी धर्म. देखून पर्यावरण दिसाचीं परबीं भेटोवपा बदला ह्या लढ्यांत दरेकल्याचो हात आनी सांगात मागतां. आमच्या एकवटाची वंय सैमा भोंवतणी बांदून आमी सैमाचे सार्थी जावया.