भांगरभूंय | प्रतिनिधी
दोडामार्ग पुलिसांनी घोवा सयत एकल्याक केली अटक
अनैतीक संबंदांतल्यान घडलो प्रकार
म्हापशें: दोडामार्गार जेवपाक या अशें सांगून घोटगेवाडी, भटवाडी हांगा व्हरून विशीता विनोद नायक (30) हिचो खून केलो. ह्या प्रकरणांत दोडामार्ग पुलिसांनी मयतीचो घरकार दुबावीत विनोद नायक (रा. मरड म्हापशें, मूळ वास्को) आनी ऋतुराज श्रवण इंगवले (रा. च्यारीवाडो मयडें, बार्देस, मूळ चंदगड (महाराष्ट्र) ह्या दोगांक अटक केल्या. मयत घरकान्नीच्या अनैतीक संबंदांतल्यान दुबावितान हें कृत्य केलें. दुबावीत विनोद नायक हो गोंय वीज खात्यांत लायनमन म्हूण नोकरेक आसून म्हापशेंचे कचेरेंत तो काम करतालो.
हो खुनाचो प्रकार मंगळारा 9 मे दिसा सांजवेळा उक्तडार आयलो. तिलारी लागसार घोटगेवाडी, भटवाडी हांगा नव्यान बांदिल्ल्या पुला खाला मयतीची कूड सांपडली. गळो अंदून खून केले उपरांत मयतीची वळख पटची न्हय म्हूण तिचो चेरो फातर घालून विद्रुप केल्लो.
घटणूक थळार मयत बायलेच्या पांयातले जोतें आनी पुला वयल्यान कूड ओडून व्हेल्ल्याच्यो खुणो दिसून आयिल्ल्यो. मजगतीं, मयतीचे कपडे आनी हेर वस्तूं वयल्यान मयत बायल गोंयची आसुये अशी शक्यताय दोडामार्ग पुलिसांनी उक्तायली आनी गोंय पुलिसां कडेन संपर्क सादलो.
त्याच दिसा सांजवेळा मयत विशीता नायक ही बेपत्ता जाल्ल्याची कागाळ म्हापशें पुलिशेंत तिच्या इश्टा कडल्यान नोंद जाल्ली. तिच्या फोट्या वयल्यान मयत बायल तीच आशिल्ल्याचें दिसून आयलें. उपरांत रोखडेंच मध्यान रातीं दोडामार्ग पुलीस म्हापश्यां पावले. फांतोडेर म्हापशें पुलिसांच्या आदारान मयतीचो घरकार दुबावीत विनोद नायक हाका ताब्यांत घेतलो. दुबावितान इश्ट ऋषिकेश इंगवले उर्फ पाटील हाचें नांव उक्तें करतकूच ताकाय ताब्यांत घेतलो आनी फांतोडेर दोगांय दुबावितांक दोडामार्गार व्हरून रितसर अटक केली.
मयत सोमारा 8 वेर रातच्या 8.30 वरां सावन बेपत्ता जाल्ली. ह्या प्रकरणांत मंगळारा सांजवेळा तिच्या इश्टान कागाळ दाखल केल्ली. तशेंच ती रातीं मेरेन दुबावीत घरकार विनोद हाचे बरोबर आशिल्ली अशी म्हायती कागाळदारान म्हापशें पुलिसांक दिल्ली. ताका लागून ह्या खून प्रकरणाचो तपास लावप पुलिसांक शक्य जालें.
दुबावीत विनोद नायक हाणें घरकान्नीचो खून केल्ल्याचो गुन्यांव तशेंच दुबावीत इश्टाच्या आदारान कूड घडणूक थळार उडयिल्ल्याचीय कबुली दिल्या. हें खून प्रकरण मयतीच्या अनैतीक संबंदांतल्यान घडिल्लें आसून दोनूय दुबावितांक अटक केल्या. तशेंच खुना खातीर वापरिल्ली मोटारूय जप्त केल्ल्याची म्हायती पुलीस निरिक्षक ऋषिकेश अधिकारी हांणी दिली.
दोनूय दुबावितांक थळाव्या न्यायालयान दोन दिसांची पुलीस कोठी दिल्या. फुडलो तपास पुलीस उपअधिक्षक रोहिणी साळुंखे हांच्या मार्गदर्शनाखाला दोडामार्ग पुलीस करतात.
मयतीचें कुळार मुळगांव दिवचले. 2015 वर्सा तिचें लग्न दुबावीत विनोद हाचे बरोबर जाल्लें. लग्ना उपरांत ती वास्को घोवा बरोबर रावताली. तांकां दोन वर्सांचो एक पूत आसा. लग्ना उपरांत कांय म्हयन्यांनी तांचे मदले संबंद इबाडूंक लागिल्ले. त्या वेळार मयतीची वळख महेंद्र गडेकार हाचे कडेन जाली. ताका लागून ती घोवालें घर सोडून गडेकार हाचे बरोबर रावंक लागली. तशेंच घरकार जेन्ना तिका आपयतालो तेन्ना ती ताचे कडेन येताली.
दुबावितान आपययिल्ल्यान सोमारा सांजवेळा ती ताका मेळपाक आयिल्ली. म्हापशें शारांतल्या एका हॉटेलांत ती दोगांय राविल्लीं. त्याच दिसा मध्यान रातीं दुबावितान जेवपाक या अशें सांगून तिका दोडामार्गार व्हेली. ताचे बरोबर दुबावीत ऋषिकेश आशिल्लो. उपरांत एकलो आपल्याक पयशे दिवपाचो आसा अशें सांगून तिका घोटगेवाडी भटवाडी हांगा घडणूक थळार पुलार व्हरून तिचो मोटारींतूच गळो अंदून खून केलो. उपरांत पुरावे नश्ट करपा हेतान तिचो चेरो फातर घालून विद्रुप केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
