भांगरभूंय | प्रतिनिधी
पावसांत झाडां रस्त्यार पडपाची शक्यताय; रानां खात्याची आडनदर
वाळपय: वर्सावळी प्रमाण गोंय-बेळगांव मजगतच्या चोर्ला घांट मार्गा वयलीं घातक झाडां मारून उडयतात. पावसाच्या दिसांनी वादळी वाऱ्या सयत खूबशीं घातक झाडां रस्त्यार पडटात, आनी येरादारी ठप्प जावपाचे प्रकार घडटात. हाका लागून प्रवासी आनी लोकांक मात हाचो त्रास सोंसचो पडटा. अंदूं मात ह्या मार्गा वयलीं घातक झाडां मारिल्लीं नात. हाका लागून पावसाच्या दिसांनी ह्या मार्गा वयल्यान येरादारी करप तकलीफोड थारतली आनी येरादारी ठप्प जावपाचे प्रकारूय घडपाची शक्यताय आसा.
गोंय-बेळगांव मजगतीं, चोर्ला घांटांतल्यान वाहनांची येरादारी व्हड प्रमाणांत जायत आसता. सुरक्षीत रस्तो आनी उणें अंतर हाका लागून वाहन चालक आनी प्रवासी ह्याच मार्गाचो उपेग करतात. गोंयचे लोक व्हड प्रमाणांत बेळगांवां बाजार करपा खातीर वतात. पावसांतूय अशे तरेची येरादारी सेगीत जायत आसता. पूण केरी ते चोर्ला घांट हें सुमार 12 किलोमिटराचे अंतर घांट वाठारांतल्यान वता. दोनूय वटांनी अटंगे रान. हाका लागून पावसाचें प्रमाण चड आशिल्ल्यान झाडां हुमटून पडटात. वादळी वाऱ्याक लागून खूबशीं झाडां मोडून पडत आशिल्ल्यान येरादारी ठप्प जावपाचे प्रकार सेगीत घडत आसतात.
हाका लागून मार्गा वयलीं घातक झाडां मारून पावसाच्या दिसांनी अडचण निर्माण जावची न्हय हे खातीर लक्ष दिवप गरजेचें आसता. पूण अंदूं मात हाचे कडेन पुरायपणान आडनदर केल्ल्याचें दिसून आयलें.
ह्या मार्गा वयलीं घातक झाडां मारून उडोवप हें आपत्कालीन वेवस्थापनाचो भाग आसा. हे खातीर उपजिल्होधिकाऱ्याची भुमिका म्हत्वाची आसता. फाटल्या खूबशा वर्सां सावन उपजिल्होधिकाऱ्याच्या निर्देशांतल्यान ह्या वाठारांतलीं घातक झाडां मारून उडयतात. अंदूं मात परिस्थिती पूर्णपणान वेगळी आसा. सत्तरी म्हालाचे उपजिल्होधिकारी प्रवीण परब हांणी घातक झाडां मारून उडोवपाचे निर्देश रान खात्याक दिल्ले. हे खातीर उजो पालोवपी दळाची मजत घेवची अशें स्पश्ट केल्लें. पूण अजापाची गजाल म्हणल्यार रान खात्याच्या संबंदीत अधिकाऱ्यांनी उपजिल्होधिकाऱ्यान आपलो आदेश फाटीं घेवचो अशी विनंती करपी पत्र तांकां धाडून दिलां. हाका लागून उपजिल्होधिकाऱ्या मुखार आतां अडचणी निर्माण जाल्यात.
रान खात्याच्या संबंदीत अधिकाऱ्यांनी अशे तरेचें पत्र दिल्ल्यान उपजिल्होधिकारी झाडां मारपाचे निर्देश दिवंक शकनात. पूण पावसांत झाडां पडून रस्तो बंद जाल्यार ताका जापसालदार कोण? अशे तरेचो प्रस्न आतां उप्रासूंक लागला.
सुमार 12 किलोमिटराचो रस्तो रानांतल्यान वता. दोनूय वटांनी व्हड प्रमाणांत झाडां आसात. ह्या घांटांत सेगीत पालसणां कोसळपाचे प्रकार घडत आसतात. ह्याच वेळार रस्त्याचे कुशीक आशिल्लीं झाडां रस्त्यार पडत आशिल्ल्यान वराचीं वरां येरादारी ठप्प जावपाचे प्रकार घडत आसतात. फाटल्या वर्सा खूबशे फावटी रातभर वाहनां रानांत आडकून पडपाच्यो घडणुको घडल्यात. ताचे उपरांत घातक झाडां मारून उडयिल्लीं. अंदूं मात घातक झाडां मारिल्लीं नात. हाका लागून अंदूं व्हड प्रमाणांत धोको निर्माण जावपाची शक्यताय आसा.
ह्या मार्गा वयलीं झाडां मारूंक नाशिल्ल्यान वाळपय उजो पालोवपी दळाक मात खरस काडची पडटली. सत्तरी म्हाल हो रान वाठारांतलो म्हाल. घातक झाडां मारूंक नाशिल्ल्यान उजो पालोवपी दळाची मात तकलीफोड जावपाची शक्यताय आसा.
हाका जापसालदार कोण?
उपजिल्होधिकारी प्रवीण परब हांणी झाडां मारपा विशीं रान खात्याक दिल्ले निर्देश आनी रान खात्यान पत्र बरोवन निर्देश फाटीं घेवपाची केल्ली विनंती, हाका लागून मार्गार पावसाच्या दिसांनी झाडां पडून येरादारी ठप्प जावपाचे प्रकार घडपाची शक्यताय आसा. हे खातीर लोक अटंग्या रानांत आडकून पडपाची शक्यताय न्हयकारूं येना. तशें जायत जाल्यार लोकां मुखार धोको निर्माण जातलो. हाका जापसालदार कोण? अशे तरेचो प्रस्न आतां लोक विचारत आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
