भांगरभूंय | प्रतिनिधी
राष्ट्रीय खेळां सर्तींत 43 खेळां प्रकारांचें आयोजन
मडगांव: राष्ट्रीय खेळां सर्तींत 43 खेळां प्रकार एकाच राज्यांत केन्नाच जाले नात. अशे तरेच्यो राष्ट्रीय सर्ती घेवन गोंय राज्य रेकॉर्ड करतलें. मंगळार सावन गोंयांत विवीध खेळांतले खेळगडे येवपाक सुरवात जातली. गोंयच्या लोकांनी तांकांय येवकार दिवचो अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. प्रमोद सावंत हांणी सोमारा सांजवेळा फातोड्डें आनी नावेलीतल्या स्टेडियमाची पळोवणी केली. ह्या वेळार मंत्री गोविंद गावडे, जिल्होधिकारी अश्वीन चंद्रू, पुलीस अधिक्षक अभिषेक धानिया, आदले आमदार दामू नायक, आमदार उल्हास तुयेंकार हांचे सयत सरकारी अधिकारी हाजीर आशिल्ले.
सुरवातेक फातोड्ड्यां दामोदर लिंगाक श्रीफळ ओंपून राष्ट्रीय खेळां सर्त बरे तरेन जावची हे खातीर गाराणें घातलें. उपरांत उलयतना मुख्यमंत्र्यांनी सांगलें की, फातोड्डेंचे पं. जवाहरलाल नेहरू स्टेडियम, नावेलीचें मनोहर पर्रीकार इनडोअर स्टेडियमा सयत प्रधानमंत्री नरेंद्र मोदी हांचे हाजिरेंत जावपी उक्तावण सुवाळ्याचे तयारे विशीं नियाळ घेवपा खातीर आयची भेट आसा.
26 ऑक्टोबराक उक्तावणाची मुखेल कार्यावळ जातली. ह्या उक्तावण सुवाळ्याक प्रधानमंत्री नरेंद्र मोदी हाजीर रावतले. फाातेड्डें, मडगांव वाठारांतल्या लोकांनी हे सर्तीक नेटाचो येवकार दिवचो अशेंय डॉ. सावंत हांणी सांगलें.
फातोड्डें स्टेडियमाची पळोवणी करतना मुख्यमंत्र्यांनी व्हीआयपी, पत्रकार, शाळेंतल्या भुरग्यां सयत लोकांच्या बसकेच्या वेवस्थेची म्हायती घेतली. 12 हजार लोकांक जर स्टेडियमांत प्रवेश दिल्लो आसतनाच तातूंत दोन हजार अॅथलीट आसतले. शाळेंतलीं भुरगीं सुमार साडेचार हजार आसतलीं. देड हजार प्रशासनाचे लोक आसतले. उण्यांत उण्यो पांच हजार सुवातो लोकां खातीर राखीव दवरच्यो अश्यो तांणी सुचोवण्यो केल्यो.
हाचे पयलीं लोकांक उक्तावणा खातीर आपोवचें पडटलें अशें दिसतालें. पूण आतां सावनूच लोकां कडल्यान निमंत्रणाची मागणी जायत आसा. ताका लागून मैदान भरतलें. ते प्रमाण सुरक्षा वेवस्था करची पडटली अशें मुख्यमंत्र्यांनी सांगलें.
हाजीर आशिल्ल्यां खातीर वळखपत्रां कशे तरेचीं आसतलीं हाची विचारपूस लेगीत मुख्यमंत्र्यांनी केली. त्या वेळार खेळगडे, व्हीआयपी, शाळेंतलीं भुरगीं अशा सगल्या घटकां खातीर वेगळ्यावेगळ्या रंगाची वळखपत्रां दितले अशें अधिकाऱ्यांनी स्पश्ट केलें. हेच बरोबर मुख्यमंत्र्यांनी प्रधानमंत्री मोदी हांचे बसकेचे वेवस्थे सयत सांगितीक कार्यावळीं खातीर वेवस्था केल्ल्या सुवातां विशींय म्हायती घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
