भांगरभूंय | प्रतिनिधी
भांगरभूंय । प्रतिनिधी
दिवचलः गोंय सरकारान गोंय डॅरी बंद करून तिच्या खाजगीकरणाचे दिकेश पावलां घाललाप सुरवात केल्या असो दुबाव साळ हांगच्या दूद उत्पादक शेतकारांनी उक्तायला. सरकाराच्यो धवल क्रांती विशींच्यो जायत्यो येवजण्यो फकत कागदार आसात. दूद उत्पादकां मेरेन त्यो पावनान. ताका लागून उत्पादक त्रासांत पडल्यात अशें साळ हांगच्या श्री भूमिका दूद उत्पादक सहकारी संस्थेच्या पत्रकार परिशदेंत शेतकारांनी सांगलें.
गोंय सरकारान जय गोंय डॅरी समूलाक हस्तांतरण करपाची आसल्यार ताणी ते मुजरत कररचें. मात ताचे पयलीं दूद उत्पादकांक अर्थीक विवंचनेतल्यान सुटावें करचे. दूद उत्पादकांच्यो सगल्यो गायो व्हरचो जें रीण आसा तें शून्याचेर हाडून तांकां रीण मुक्त करचें. दूद उत्पादन संस्था बरखास्त करच्यो अश्यो सूचोवण्यो दूद उत्पादकांनी सरकाराक केल्यात.
फाटल्या 9 म्हयन्यां सावन आमच्या संस्थेच्या सक्रीय अशा 53 उत्पादकांक आदारभूत मोल मेळ्ळें ना आमी डॅरीक दिसपट्टें 780 लीटर दुदाची पुरवण करतात. लाभांश, आदारभूत मोल मेळून गोंय डॅरी कडल्यान आमकां 16 लाख रुपये येणे आसात अशी म्हायती संस्थेचो अध्यक्ष आदिनाथ परब हाणे पत्रकार परिशदेंत दिली. दूद उत्पादकांक गोरवांची देखभाल आनी तांची खावड मेळून दिसाक सुमार तिनशें रुपपे खर्च येता. दूदात जाय तितलें मोल मेळना. ताका लागून खर्च आनी अर्थीक उत्पन्न हाचें गणित जुळना अशें ताणे सांगलें.
कामधेनू येवजण सुरू आशिल्ली तेन्ना एक गाय विकती घेवपा खातीर 18 रुपये पडटाले आनी 40 टक्के अनुदान मेळटालें. हीच गाय कोपार्डें हांगच्या सरकारी फॉर्मांतल्यान घेवपाक सध्या 70 हजार रुपये दिवचे पडटात. रिणाचे हप्ते तो भरता आनी अनुदान केन्ना मेळटलें हाची ताका वाट पळयत रावची पडटा. विकती घेतिल्ली गाय दूद दिना जाल्यार कोपार्डे फार्मान ती परत घेवपाक जाय असो नेम सरकारान करपाक जाय अशें दूद उत्पादकांनी सांगलें.
अनुदान आनी आदारभूत मोलाची रक्कम फाटल्या 9 म्हयन्यां सावन दूद उत्पादकांक किद्याक दिनात हाची चवकशी करपाची मागणी लाडफें हांगच्या नंदिनी दूद उत्पादक संस्थेचो वांगडी महादेव गड्डी हाणे केली. समूल दूद कंपनी दर दोन म्हयन्यांत लाभाश दिता. गोंय डॅरी ताका कित्यात कळाव लायना. गोंय सरकार आनी सहकार खात्याक डॅरीक सोपोवन समूलाक वाव दिवपाचो आसा काय कितें असो गड्डी हाचो प्रश्न आसा.
साळ वाठारांतल्या दूद उत्पादकांनी 2021-22 वर्सा गोंय डॅरीक 4,80 लाख लीटर दूद दिलें. 2022-23 वर्सा 2.40 लाख लीटर दूद दिलें. 2 लाख 40 हजाराची तफावत हांगा दिसून येता. दूद उत्पादक समूला कडेन गेले नात. व्हो फरक फकत गायांचो पशु दोतोरा कडल्यान वेळार तपासणी जायना आनी देखभाल सारकी जायना देखून दूद उत्पादन कमी जायत चल्ला. दूद उत्पादकांक सरकारा कडल्यान आर्थीक सहकार्य मेळना अशें आमठाणे दूद संस्थेचो अध्यक्ष वैभव परब हाणे सांगलें. आमठाणे, मेणकुरें, साळ, कुमयाळा, खोलपेवाडी, कासारपाल आनी लाडफे व्हो वाठार सगल्यांत चड दूद उत्पादन करपी पट्टो आसा. लाडफेच्या नंदिनी संस्थेन फाटलीं कांय वर्सां दूद उत्पादना खातीर सरकारी पुरस्कार मेळयल्यात अशें महादेव गुड्डीन सांगलें.
पत्रकार परिशदेक श्री भूमिका दूध उत्पादक सहकारी संस्था – साळचे अध्यक्ष आदिनाथ परब, सचीव सगुण राऊत, वांगडी विशाल परब, दीपक पडवळ , व्हिक्टर डिसोझा, सुखाजी गावस, अनिल राऊत, समीर परब , नंदिनी दूध उत्पादक सहकारी संस्था – लाडफेंचे वांगडी महादेव गड्डी, आमठाणे दूध उत्पादक सहकारी संस्था – आमठाणेचे अध्यक्ष वैभव परब हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
