भांगरभूंय | प्रतिनिधी
11,115 जाणांनी घेतलो लाव, 1,017 मतदारांनी सोडलो हक्क
भांगरभूंय । प्रतिनिधी
पणजीः पोस्टल बॅलटाची (टपाल मतदान) दिल्ले सुविधेचो 12,416 जाणां मदल्या 11,115 मतदारांनी लाव घेवन लोकसभा वेंचणुके खातीर पोस्टल बॅलट मतदान केलें. गोंयांत पोस्टल मतदान 77.75 टक्के जालें. 1,017 मतदारांनी मात हे सुविधेचो लाव घेवंक ना. तातूंत उत्तर गोंयांतल्या 562 आनी दक्षीण गोंयांतल्या 455 मतदारांचो आस्पाव आसा.
लोकसभा वेंचणुके खातीर सर्वीस मतदार, 85 वर्सां पिराये वयले, कोरोना जाल्ले, सामके गरजेचे सेवेंत, पुलीस, गृह खात्यांत वावर करपी तशेंच हेर मेळून 12,416 मतदारांनी पोस्टल बॅलट मतदाना खातीर नोंदणी केल्ली. पूण तातूंतल्या 11,115 जाणांनी ह्या मतदानाचो लाव घेतलो, जाल्यार 1,017 जाणांनी मतदान करूंक ना. उत्तर गोंयांतल्या 6,812 जाणांनी पोस्टल बॅलटा खातीर नोंदणी केल्ली. तातूंतल्या 6,124 जाणांनी मतदान केलें, जाल्यार 562 जाणांनी मतदान करूंक ना. ताका लागून थंयची टक्केवारी 79.50 टक्के जाली. दक्षीण गोंयांतल्या 5,604 जाणांक ही सुविधा दिल्ली. थंयच्या 4,991 जाणांनी मतदान केलें. उरिल्ल्या 455 जाणांनी मतदान करूंक ना. ताका लागून थंयची टक्केवारी 74.69 टक्के जाली.
हक्क सोडिल्यांक आयज संद ना
पोस्टल बॅलेट मतदानाचो पर्याय स्विकारून लेगीत ज्या मतदारांनी मतदान करूंक ना, तांकां मंगळारा मतदान केंद्रांचेर मतदान करपाक मेळचें ना, अशें मुख्य वेंचणूक अधिकारी रमेश वर्मा हांणी जाहीर केलां. ताका लागून सुमार 1,017 मतदार हे खेपे मतदाना पासून पयस उरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
