भांगरभूंय | प्रतिनिधी
-अमीत पालेकार, रामराव वाघ, दत्तप्रसाद नायक हांकां धाडिल्ले समन्स
पणजी: बिरेस्तारा ईडीन आम आदमी पक्ष (आप) फुडारी अमीत पालेकार, रामराव वाघ हांचे सयत वेवसायीक दत्तप्रसाद नायक आनी भंडारी समाजाचे अध्यक्ष अशोक नायक हांची चवकशी केली. सकाळीं 11.30 वरा पसून सांजे उसरां मेरेन तांची चवकशी सुरू आशिल्ली. ही चवकशी दिल्लींतल्या सोरो धोरण तशेंच 2022 च्या गोंय विधानसभा वेंचणुकेंतल्या खर्चा विशीं आशिल्ल्याचे समजता. मात चवकशी केल्ल्या चवगांनीय हे विशीं उक्तेंपणान म्हायती दिवपाक न्हयकार दिलो.
मेळिल्ले म्हायती प्रमाण, आप फुडाऱ्यांक 2022 त जाल्ले विधानसभा वेंचणुकेंतल्या खर्चाचो तपशील विचारिल्लो. तशेंच सगल्यांक तांच्या खाजगी बँक खात्याचे डिटेल्स लेगीत दिवपाक सांगलें. चवगांकूय ईडीन बुधवारा सांजे 4 वरांचेर समन्स धाडिल्ले. तांकां बिरेस्तारा सकाळीं 11.15 वरांचेर ईडीच्या पाटो हांगाच्या कार्यालयांत आपयिल्ले.
चवकशी वेळार दनपारां 1.45 ते 2.15 मजगती सगल्यांक जेवपा खातीर सोडिल्ले. त्या वेळार पालेकार हांणी म्हणलें, ईडी खंयच्या विशया विशीं चवकशी करता हाची म्हायती आपूण सध्या दिवपाक शकना. हे विशीं तुमी ईडी अधिकाऱ्यांक विचारचे. तांणी म्हजे कडेन कांय डेटा मागला. तो आपूण तांकां दितलो. आमी तांचे चवकशेक पुराय सहकार्य दिला.
मजगती, आमदार व्हेझी व्हिएगश, क्रूझ सिल्वा हांणी भाजप सरकाराचेर टिका केली. ही ईडी चवकशी म्हणल्यार राज्यांतल्या भोवजन समाजाचेर केल्लो आघात आसा. भाजप सरकार हुकूमशाय पद्दतीन विरोधकांक सोंपोवपाक पळयता. आप फुडाऱ्यांक चवकशे खातीर आपोवन फक्त बसोवन दवरला. सध्या देशांतली लोकशाय वाचोवपाक इंडिया अाघाडी हो एकमेव पर्याय आसा.
———
ईडी आपलें काम करता. आमी तांकां सहकार्य करतात. हो नाटकाचो पयलो अंक आशिल्लो. चवकशे खातीर आपयिल्ले चवगूय भंडारी समाजाचे आशिल्ले. हो योगायोग न्हय. पूण हाचे फाटल्यान जे कोण आसात तांणी कर्माचो सिद्धांत जाणून घेवचो. फाल्यां तांचेरूय ही परिस्थिती येवपाक शकता.
-अमीत पालेकार
——-
ईडीन विधानसभा वेंचणुके विशीं कांय प्रस्न विचारले. तांणी निवड खर्च, कंपेनींग, हांव कोणाच्या संपर्कांत आशिल्लो हे विशीं म्हायती विचारली. आपूण तांकां गरजेची ती सगली म्हायती दिल्या.
-रामराव वाघ
—–
ईडीक कोणीतरी आपूण विधानसभा वेंचणुकेंत उमेदवार आशिल्ल्याची म्हायती दिली. हे विशी तांणी विचारणा केली. अापूण तांकां पुराय सहकार्य केलां.
दत्तप्रसाद नायक
——-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
