भांगरभूंय | प्रतिनिधी
परषोत्तम रुपाला: सागरी परिक्रमाचें उत्कृश्ट आयोजन
काणकोण: सागर परिक्रमा हे कार्यावळींतल्यान नुस्तेमार भावां कडेन संपर्क सादून तांच्यो समस्या समजून घेवपाक मेळ्ळ्यो. सकाळीं 8 वरां सावन हे कार्यावळींत आमी वास्को जेटी पळयली, परंपारीक नुस्तेमारांची भेट घेतली. नुस्तें प्रक्रिया प्रकल्पाक भेट दिली. हे भेटी वेळार गोंयांतल्या नुस्तेमारांनी मांडिल्ल्यो समस्या सोडोवपाचे नदरेन यत्न करतले अशें केंद्रीय नुस्तेमार राज्यमंत्री परषोत्तम रुपाला हांणी सांगलें.
बुधवारा 17 वेर सागर परिक्रमा ह्या अभियानाचें महाराष्ट्रांतल्या रायगडार सुरवात जाल्ली. काल काणकोणच्या राजबाग हांगा कार्यावळीची सांगता जाली.
ह्या वेळार माचयेर काणकोणचे आमदार आनी सभापती रमेश तवडकार, नुस्तेमार मंत्री नीळकंठ हळर्णकार, भारत सरकारचे जोड सचीव डॉ. जे. बालाजी, जे.एन. स्वाहायन, एस.एस. गील, डॉ. अभिलाक्ष लिखी हांचे सयत भारतीय तटरक्षक दळ, भारतीय नुस्तें सर्वेक्षण संस्था, महाराष्ट्र सागरी मंडळ (महाराष्ट्र दा मेरीटाईम बॉर्ड) आनी हेर संस्थांचे वरिश्ठ अधिकारी माचयेर हाजीर आशिल्ले.
रायगड ते काणकोण ह्या दर्या पाट्ट्यांतले नुस्तेमार आनी हेर नुस्तें वेवसायीक तशेंच संबंदितांच्यो समस्या समजून घेवप, प्रधानमंत्री मत्स्य संपदा (पीएमएमएसवाय) आनी किसान क्रेडीट कार्ड (केसीसी) ह्या सारक्या विवीध नुस्तें पोसप येवजण आनी उपक्रमांचो लाव मेळोवन दिवन तांची उन्नती सादप, हें ह्या परिक्रमाच्या पांचव्या टप्प्याचें उद्दिश्ट आसा अशें रुपाला हांणी सांगलें.
मुखार उलयतना तांणी म्हणलें, गुजरातांत दुदाची डेरी आसून थंय दूद व्हड प्रमाणांत मेळटा. दूद मेळपा खातीर गोरवां पोसप म्हत्वाचें आसा. डेरी घालचे पयली गुजरातांतल्या डेरींची पळोवणी करची. डेरी खातीर सगले तरेचें सहकार्य करूं अशें रुपाला हांणी सांगलें.
मानेस्तां हस्तुकीं नुस्तेमार भावांक आनी भयणींक विवीध येवजणे खाला धनादेश भेटयले. जाल्यार कांय नुस्तेमारांक नुस्तें सांठोवन दवरपा खातीर पेटयो भेटयल्यो.
ह्या वेळार उलयतना सभापती रमेश तवडकार हांणी सांगलें की काणकोणचे बेकारीचेर उपाय काडपाचे नदरेन हांगा दुदाची डेरी तशेंच मसल फार्मींग (जोप, शिनाणें) नुस्त्याची पैदास केल्यार बेकारी कांय प्रमाणांत उणी जातली अशें तांणी म्हणलें.
नुस्तेमारांच्यो अडचणी समजून घेवन त्यो सोडोवपाचे नदरेन केंद्र सरकारान सागर परिक्रमा कार्यावळीचें आयोजन केलां. नुस्तेमारांनी आपल्यो समस्या मांडिल्ल्यान त्यो सोडोवपाक उपेगाच्यो थारतल्यो अशें नुस्तेमार मंत्री नीळकंठ हळर्णकार हांणी सांगलें.
गोंय सरकाराच्यो विवीध येवजण्यो आसात ताचो फायदो नुस्तेमारांनी घेवचो अशें आवाहनूय हळर्णकार हांणी केलें. ह्या वेळार हळर्णकार हांचे हस्तुकीं कुणबी शाल, आनी गोंयचें दिवज दिवन मंत्री परषोत्तम रुपाला हांचो भोवमान केलो.
कार्यावळीचें सुत्रसंचाल प्रा. सुभाष जाण हांणी केलें. येवकार मंत्री नीळकंठ हळर्णकार हांणी दिलो. मानेस्तांक संचालिका डॉ. शर्मिला मोंतेरो हांणी फुलांतुरे भेटयले. ह्या वेळार क्षत्रीय पागी समाजाचे अध्यक्ष अशोक धुरी, रुद्रेश नमशीकार, प्रमोद जुवेंकार हांणी समस्यांचें निवेदन मंत्री रुपाला हांकां भेटयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
