भांगरभूंय | प्रतिनिधी
फा. मायरन बार्रेटो ः मांवाच्या वाडदिसा सुनेच्या कविता झेल्याचें लोकार्पण
भांगरभूंय प्रतिनिधी
काणकोण ः गोंयची अस्मिताय आनी गोंयकारपण आमी सांबाळूंक जाय. गोडशें ह्या कोंकणी कविता झेल्यांत धर्माची, तत्वाची आवड निर्माण केल्या. गोडशें कविता झेल्यान कोंकणी भाशेक घटाय दिल्या. कवयित्री क्रिस्तीना मार्टीन्स हांणी आपल्यो भावनाय ह्या कविता झेल्या वरवीं प्रकट केल्यात अशें फादर मायरन बार्रेटो हांणी सांगलें.
आमी काणकोणकार हे संस्थेन ज्येश्ठ नागरीक मंचाचे अध्यक्ष गिलेर्म मार्टीन्स हांचो तांच्या 80 व्या वाडदिसा निमतान सत्कार सुवाळो घडोवन हाडिल्लो. ह्या सुवाळ्यांत गिलेर्म मार्टीन्स हांची सून क्रिस्तीना मार्टीन्स हांच्या कविता झेल्याचें लोकार्पण करतकच ते उलयताले.
राजबागांतल्या एका रिसोर्टांत हें पुस्तक प्रकाशन जालें. गोडशें ह्या कवितेच्या पुस्तकान क्रिस्तीना मार्टीन्स हांच्या पयल्या पुस्तकाची सुरवात जाल्या. तांचे लिखणींतल्यान अशीं आनिकूय पुस्तकां येतलीं अशें नगराध्यक्ष सायमन रेबेलो हांणी सांगलें.
गिलेर्म मार्टीन्स हांणी काणकोणच्या ललित हाॅटेलांत सेवा दितना काणकोणकारांक ताचो कसो फायदो जातलो तें पळयलें आनी काणकोणांतल्या लोकांक काणकोणच्या ललित हाॅटेलांत आसपाव करूंक फुडाकार घेतलो अशें रेबेलो हांणी सांगलें.
गोंयकार हो म्होंवाळ आनी गोड मनीस. ह्या पुस्तकांत गोंयकारां विशींच्यो कविता आसात आनी देखुनूच ह्या कविता झेल्याचें नांव गोडशें दवरलां. आमी आयज पाश्चात्य संस्कृती आपणावंक लागल्यात आनी ती आपणायतना आमची नीज संस्कृती आमी विसरूंक लागल्यात. आमच्या पूर्वजांनी तिगोवन दवरिल्ली संस्कृती आमी सांबाळुया अशें क्रिस्तीना मार्टीन्स हांणी सांगलें.
गिलेर्म मार्टीन्स हांणी आमी काणकोणकार आनी ज्येश्ठ नागरीक मंचान हो सत्कार घडोवन हाडिल्ले खातीर तांचे उपकार मानले. ह्या वेळार डाॅ. धिल्लन देसाय, आर. एस. नायक, नातविदाद डिसा, दिलखूश शेट, होनोराद फर्नांडीस, ललित हाॅटेलाचे केंद्रीय अभियंते विनय वासुदेव आनी ललित हाॅटेलाचे काणकोणचे सरवेवस्थापक विनोद, आदले नगराध्यक्ष राजेंद्र देसाय आनी प्रशांत नायक हांची गिलेर्म मार्टीन्साच्या कार्याची वळख सांगपी उलोवपां जालीं.
मानेस्तांक अजित पैंगीणकार, इजित ग्रासियस आनी चेतन आचार्य हांणी फुलांतुरो भेटयले. सुदेश नायक हांणी मानपत्राचें वाचन केलें. कार्यावळीचें सुत्रसंचालन रमेश कोमरपंत हांणी केलें जाल्यार झुलो शेट हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
