भांगरभूंय | प्रतिनिधी
भांगरभूंय । प्रतिनिधी
काणकोणः गोंयकारांक येत्या त्या पावसाळ्यांत लावपा खातीर जाय थंय जाय तेन्ना सरकार काजू रोपे फुकट दितलो. हे वरवीं कृशी मळांत आनीक 3 हजार शेतकारांक हाडपाचो यत्न करतले अशें उदकास्रोत मंत्री सुभाष शिरोडकार हांणी सांगलें. शिरोटी- खोला हांगा 49 लाख रुपया खर्च करून बांदपाच्या बंधाऱ्याचो बुन्यादी फातोर बसयल्ले उपरांत ते उलयताले. ह्या वेळार केंपेंचो आमदार एल्टन डिकॉस्ता, आदलो आमदार बाबू कवळेकार जिल्हो पंचायत वांगडी शाणू वेळीप आनी खालोच सरपंज अजय पागी हाजीर आशिल्लो.
कृशी उत्पादनाक उदक मेळचें हे खातीर सद्या आसात त्या 337 बंदाऱ्यांक आनीक 100 बंदाऱ्यांची भर घालतले अशी म्हायती दितना फाटल्या बऱ्याच वर्सा सावन शेता पसून पयस गेल्ल्या शेतकारांक परत शेतांत हाडपाची आमची मोख आसा. कोवीड उपरांत उत्पन्नाचें सादन गेल्ल्यांक जायत्या जाणांक परत शेतां कसपाची गरज पडली. पूर्वजांचीं पडंग उडयल्लीं शेतां परत कसपाक जाय त्या जाणांनी सुरवात केल्या. मात उदक मेळनाशिल्ल्यान मनांत आसून लेगीत चडश्या जाणांक शेतांत लागवड करपाक मेळना. ते खातीर पाणथळ वाठारांत आनीक शंबर बंदारे बांदपाचें सरकारान थारायलां अशे शिरोडकारान सांगलें.
उदक ना जाल्यार शिंपणावळ जावची ना आनी शेतांय पिकची नांत, ताका लागून उदक एकठांय करून दवोरपाची सामकी गरज आसा. केपें मतदारसंघात 6 नवे बंधारे आनी 20 बांयो बांदपाचें उतर उदकास्रोत खात्यान दिलां. खणगिणी आनी बेतुलच्या वझऱ्याचें सोबितीकरण करतले आनी नुवें हांगा राखणे वटन बांदतले अशें आमदार एल्टन डिकॉस्तान सांगलें.
राज्यांतल्या शेतां आनी कृशी मळाचेर उदकास्रोत खात्यान बरें काम चलयलां. हांव कृशी मंत्री आशिल्लों तेन्ना उदकास्रोत खात्याच्या पालवान काम करतालों अशें बाबू कवळेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
