भांगरभूंय | प्रतिनिधी
कामाक केंद्रीय म्हामार्ग मंत्रालयाची मंजुरी
काणकोण: गुळ्यां अशीर रस्त्याक लागून राष्ट्रीय म्हामार्ग 66 वयल्यान धांवपी वाहनां शेतांत पडटालीं. जाल्यार व्हॉल्तांक लागून करमलघांटार सेगीत अपघात जावपा बरोबरूच वाहनां खोल देगणांत पडटालीं. हांगासरली अपघातांची माळ सुरूच उरत आशिल्ल्यान काणकोणां हो कळीचो मुद्दो थारिल्लो. गुळें ते करमलघांट रस्तो रुंदीकरणाची सेगीत मागणी जाताली. गुळ्यां शेतजमीन धनयांची जोड बसका घेवन, आनी तांचे कडल्यान हरकत ना दाखलो घेवन काणकोणचे आमदार आनी सभापाती रमेश तवडकार हांणी रस्तो रुंदीकरणाच्या कामाक केंद्रीय रस्तो येरादारी आनी म्हामार्ग मंत्री नितीन गडकरी हांचे कडल्यान मंजुरी मेळयली, आनी अर्थीक निधीय मंजूर करून हाडलो. काल (बुधवारा) ह्या कामाचो शुभारंभ स्थानीक वेळीप, राम वेळीप, घाटू वेळीप हांणी कुदळ मारून केलो.
ह्या वेळार सभापती रमेश तवडकार, नगराध्यक्ष रमाकांत नायक गांवकार, उपनगराध्यक्ष नार्सिस्को फर्नांडीस, नगरसेविका सारा देसाय, नगरसेवक सायमन रेबेलो, लक्ष्मण पागी, भाजपा मंडळ अध्यक्ष विशाल देसाय, थळावे पंच गणेश गांवकार, अक्षदा वेळीप, निलेश गांवकार आनी रस्तो विभागाचे अभियंते आनी हेर मानेस्त हाजीर आशिल्ले.
ह्या वेळार तवडकार हांणी रस्तो रुंदीकरणा खातीर शेतकारांनी आपली जमीन दिल्ले खातीर तांचे उपकार मानले. चार लेनींत हो रस्तो जावपाचे नदरेन केंद्रीय रस्तो आनी म्हामार्ग मंत्रालया वतीन जमीन संपादन करपा खातीर हाचे पयलींच निधी मंजूर जाल्ल्याचें तांणी सांगलें. पूण गुळें ते करमलघांट मेरेनच्या ह्या घातक रस्त्याचें काम झुजा पांवड्यार सुरू करपा खातीर 4 कोटी रुपया मंजूर करून हाडिल्ल्याचें तवडकार हांणी सांगलें.
सभापती तवडकार हांच्या कश्टाक लागून काणकोणचो विकास जायत आसा. आयज मेरेन खंयच्याच सभापतीन जे काम करूंक ना, तें तवडकार करून दाखयतात अशें नगराध्यक्ष रमाकांत नायक गांवकार हांणी सांगलें. ह्या वेळार गणेश गांवकार हांचेंय उलोवप जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
