भांगरभूंय | प्रतिनिधी
प्रॉजेक्टर, स्पिकर आनी हेर साहित्य फारायलें
फोंडें: गाळवाडो-निरंकाला सरकारी मुळेवे शाळेंत बुधवारा रातीं अनवळखी चोरांनी दाराचें कुलप मोडून शाळेंत प्रवेश केलो. शाळेंत दवरिल्लो प्रॉजेक्टर, स्पिकर आनी हेर साहित्य चोरांनी फारायलें. मुखेल रस्त्याचे कुशीक आशिल्ले शाळेंत चोरी जाल्ल्यान वाठारांत एकूच खवदळ पडला.
बिरेस्तारा सकाळीं वाठारांतलीं भुरगीं शाळेंत आयले उपरांत मुखेल दार उक्तें आशिल्ल्याचें दिसून आयलें. ह्या वेळार शिक्षकांनी शाळेंत प्रवेश करून पळोवणी करतकूच चोरांनी रातच्या वेळार प्रवेश करून साहित्य फारायिल्ल्याचें नदरेक आयलें. हे विशीं फोंडें पुलिसांक म्हायती दिल्या.
चोरांनी बुधवारा रातीं शाळेंत प्रवेश करून कांय दिसां पयलींच देणगीच्या रुपान मेळिल्लो प्रॉजेक्टर, स्पिकर, दिवली आनी हेर साहित्य फारायलें. तशेंच चार आलमारींची दारां उक्तीं करून तातूंतलें साहित्य जमनीर उडयलें. आलमारींत दवरिल्लें बँकेचे पासबूक लेगीत चोरांनी जमनीर उडोवन दिल्ल्याचें दिसून आयलें. उपनिरिक्षक परेश सिनारी हांणी घडणुकेचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
