भांगरभूंय | प्रतिनिधी
महोत्सवाचें आयोजन जातलें दर वर्सा; महसूल वाडीचेर लक्ष
म्हापशें: ग्रामीण पर्यटनाक चालना दिवपा खातीर पुरातन म्हत्व लाबिल्ल्या खोर्जुंवें किल्ल्यार खोर्जुवें महोत्सव मनयतले. ह्या महोत्सवाचें आयोजन दर वर्सा करतले आनी ते खातीर महसूल वाडीचेर लक्ष दितले अशी घोशणा पुरातत्व खात्याचे मंत्री सुभाष फळदेसाय हांणी केली.
खोर्जुंवें किल्ल्याच्या सुरू आशिल्ल्या जिर्णोद्धार कामाची पळोवणी केले उपरांत मंत्री फळदेसाय उलयताले. ह्या वेळार आमदार अॅड. कार्लुस फेरेरा, पुरातत्व खात्याचे अधिकारी, हळदोणेंचे सरपंच अश्वीन डिसोझा, उपसरपंच अभिज्ञा सातार्डेकार आनी पंच वांगडी हाजीर आशिल्ले.
मंत्री फळदेसाय हांणी म्हणलें. खोर्जुंवें किल्ल्याच्या जिर्णोद्धाराचे 30 टक्क काम पुराय जालां. उरिल्लें काम फुडल्या 10 म्हयन्यांत पुराय करतले. निर्धारीत वेळांत काम पुराय करपाक अडचणी येत आसल्यो तरी ताचेर मात करून काम पुराय करतले. गोंयच्या हेर किल्ल्यांचेंय जिर्णोद्धाराचें काम सुरू आसून ह्या किल्ल्यांचे म्हत्व तिगोवन दवरपाचेर भर दितले.
आमदार अॅड. कार्लुस फेरेरान म्हणलें, ह्या किल्लो वाठाराचे सोबितीकरण करतले. ते खातीर अतिरिक्त सुवात उपलब्ध केल्या. गोंय फक्त दर्यादेगां खातीर प्रसिद्ध नासून ग्रीमण सौंदर्य लोकां मेरेन पावोवपाचो यत्न आसा. हो किल्लो पर्यटकां खातीर आकर्शणाचें केंद्र थारतलें असो विस्वास फेरेरान उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
