भांगरभूंय | प्रतिनिधी
फोंडें: खांडेपारा स्टेट बँकेच्या फांट्यांत आयतारा रातीं चोरान एटीएम मशीन समजून पासबूक प्रिटींग मशीन फारावपाचो प्रकार सोमारा सकाळीं उक्तडार आयलो. अनवळखी चोरान पयशे फारावंक नासले तरी पासबूक मशीन फारायिल्ल्यान अर्थीक लुकसाणीक सामकार वचचें पडलें. हे संबंदी सांजवेळ मेरेन फोंडें पुलीस स्टेशनार कागाळ करूंक नाशिल्ली.
मेळिल्ले म्हायती प्रमाण आयतारा रातीं एका अनवळखी चोरान एटीएम मशीन आशिल्ले कुडीत प्रवेश केलो. एटीएम मशिनाचे कुशीक पासबूक प्रिटींग आशिल्लें मशीन अनवळखी चोरान उबारून सायकलीचेर घालें आनी फाटले वटेन आशिल्ल्या उड्डाण पुला कुशीक व्हेलें. काळखाचो फायदो घेवन अनवळख्यान मशीन फोडून काडलें आनी थंयच उडयलें.
सोमारा सकाळीं बँकेचे वेवस्थापक रोहीत विश्वकर्मा फांट्यांत येतकूच तांच्या लक्षांत हो प्रकार आयलो. बँकेच्या सीसीटीव्ही फुटेजींत अनवळखी मनीस दिसून येता. सीसी कॅमेऱ्यांत आपलो चेरो दिसचो न्हय म्हूण ताणें आंगा वयलें टीशर्ट तकलेक गुठलायिल्लें. चोरी प्रकरणांत सांजवेळ मेरेन फोंडें पुलीस स्टेशनार रीतसर कागाळ दिवंक नाशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
