भांगरभूंय | प्रतिनिधी
दिसाळीं भोवमाध्यमी जातना लोकभाशेंतलें, राजभाशेंतलें ‘भांगरभूंय’ कोंकणी दिसाळें कशें फाटीं उरतलें? तेंपा प्रमाण कुरपणें घालत ‘भांगरभूंय’ दिसाळें भोवमाध्यमी जालां. गोंयचे राजभाशेचे उदरगतीचे वाटे वयलें हें एक व्हड पावल, जैतय. दिसाळें भोवमाध्यमांत वतना चुको जातात, इंग्लीश भाशेच्या उतरांचोय उपेग जाता, हिन्दी आनी मराठी भाशेंतलीं उतरांय ‘भांगरभूंयं’त छापून आयल्यार रागार, फुगार जावचें न्हय. दिसाळें भोवमाध्यमी जातना दिसाळ्यांतल्या कामगारांक प्रशिक्षणाच्यो कार्यावळी जातात, प्रशिक्षणांतल्यान मेळिल्ले माहितीचो उपेग जावपाक जाय. वेगीं बदलपी तंत्रगिन्यान आपणायतना, भोवमाध्यमी, खबरो भोवरंगी जातना दिसाळ्यांक माहिती तंत्रज्ञान कायद्या प्रमाण फुडें वच्चें पडटा. माहिती तंत्रज्ञानाची भास आपणावन दिसाळ्यांतले सगले कामगार पत्रकार जातात, जावपाक सोदतात पूण तशें करतना समाजीक बांदिलकी कुशीक पडची न्हय हाची जतनाय घेवपी कितले आसात? मोलावणी करतना तो विचार करचोच पडटा.
समाजीक बांदिलकी, समाजाचें प्रबोधन करपाक गरज तेन्ना भोंवचेंय पडटा. भोंवपा खातिरूय एक पिराय आसता, थोड्यांक सदांच भोंवपाक भावता, जिणेच्या एका खिणार भोंवप शक्य जायना तेन्ना ऑनलायन माध्यमांतल्यान भोंवडेच्यो कार्यावळी जातात. त्या कार्यावळींच्या भोंवडेची प्रसिद्धी रोखड्या रोखडी जाली ना जाल्यार तिडपीय आसतात. तिडक उक्तावपाक दिसाळ्यांचे कचेरेंत पयलीं अनुमती घेवन वचपाक हरकत ना.
भोवमाध्यमी जातना एकादरो फाटीं पडटा, दोग तीग फुडें पावतात तेन्ना घुस्मटत रावचे परस दिसपटे वावरांत घुस्पून घेतल्यार आपसूक चिंतूंक नाशिल्लें जैत मेळटा.
तेंपा प्रमाण कुरपणें घालत पत्रकारितेंत साडे तीन दसकां पुराय करतना अणभवांतल्यान फुडारांत कितें जातलें हें सांगपी नदरय तुमकां आमकां कित्याक मेळची न्हय? फाटल्या आयतारा मनांतलें लिखाण विखुरिल्ल्या पानांतल्यान लॅपटॉपार घालतना जें ‘भांगरभूंय’ दिसाळ्यान छापलां तें सत जालें हाचे इतली दुसरी खोस ना. ‘भांगरभूंय’ गरजे भायर दिसाळ्यांत छापिल्लें तें सत जालें असो अधिकार सांगना, तशें सांगपाक भोवमाध्यमांच्या युगांत संपादप्यांक फुरसत आसता व्हय? हक सांगना जाल्यार तें चोरपीय हजार आसतात. मध्यान रातीं ‘भांगरभूंयें’तलीं पानांचीं पानां लॅपटॉपा वयल्यान अमेरिकेक हेर माध्यमांतल्यान पावची ना अशें न्हय. तंत्रगिन्यान खिणांत बदलता, पत्रकारांकय तें आपणावचें पडटा. पत्रकार कागदा वयल्यान लॅपटॉपार पावले, विधानसभेंतय लॅपटॉप आयल्यात, ल्हान आनी व्हड. मोबायलारय दिसाळीं भोवमाध्यमांतल्यान भोवरंगीत जावन धांवतात तेन्ना ती अचूक आसा काय ना हें तपासपाचो वावर वाचप्यांचो, आयकुप्यांचो, पळोवप्यांचो. योग्य वेळार योग्य लिखाण (टायमली) बरोवप, धाडप, छापप हीं तीन आंगां बरोवपी, संपादप्यांक आसप आयची, फाल्यांचीय गरज. जाल्ल्या कार्यावळींच्यो खबरो उरल्यो जाल्यार त्यो कार्यावळीच्या दुसर्या दिसा छापूंक हरकत नासची, चड दीस
दवरल्यार त्यो शेळ्यो जातात, छापपाकय वेळाची मर्यादा आसप बरें. ज्येश्ठ,
वरिश्ठ पत्रकार जयंत संभाजी, सुरेश
स. नाईक हे ते नदरेंतल्यान एक बरे मार्गदर्शक.
दिसाळीं भोवमाध्यमी जातात तेन्ना खबरोय भोवमाध्यमांक सोबसारक्यो जावच्यो पडटात.
खबरेचो इण्ट्रो ल्हान बरोवप आनी सुरवेक तो सगल्या माध्यमांतल्यान लोकां मेरेन पावोवप ही कळाशी पत्रकारांक आसची पडटली. खबरेचो मुखेल भाग म्हणल्यार इण्ट्रो कमीत कमी उतरांनी बरोवपी शिक्षण, प्रशिक्षण जाय. मूळ गोंयकार पूण पुणे सकाळ दिसाळ्यान आशिल्ले पत्रकार मोहन वैद्य हांणी गोमन्तक दिसाळ्यांतल्या वांगड्यांक एस एम एस कशे धाडप, बांदप तें शिकयलें. प्रकाशन वेवसायांत ते थिरावल्यात, तांचो भांगरभूंय वयलो मोग मातय उणो जावंक ना.
मुखेल खबरेचो इण्ट्रो, दिसाळीं बोटा एदीं जावन विदेशांत पावता तेन्ना तांकां ताज्यो तकतकीत खबरो मेळपाचें, दिवपाचें तंत्र, मंत्र शिकपाक तयार रावचें पडटलें. एकाच्या नांव, मोबायल नंबरार धाडिल्ल्यो खबरो दुसरे कडेनच न्हय उगत्या मळबांतय पावतात ते खातीर खबरांचीं गुपितां सांबाळपाचें तंत्रगिन्यानय आयलां, दिसाळ्यांनीय तें पावलां.
भविश्याचेर नदर आशिल्ली भोवमाध्यमी मिडिया घडोवपाचें आव्हान जांणी भोवमाध्यमाचो आरंब, दावो केलो तांचे मुखारय आसा. दोळे तकले वयले
स्क्रिनीक लायले म्हणून जावचे ना, तकली जाग्यार आसल्यार, सादूर रावल्यार, वाचल्यार, फुडाराचो विचार
केल्यार ‘भांगरभूंय’ कित्याक जिखची ना? एकी जाय बेकी नाका, धांवतनाय मतींत दवरात.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
