भांगरभूंय | प्रतिनिधी
बाणावले जिवघेणो हल्लो प्रकरण
मडगांव: बाणावले तरणाट्यांचेर जिवघेणो हल्लो केल्ल्या प्रकरणांत कोलवें पुलिसांनी आनीक तीन दुबावितांक अटक केल्या. आकाश आटवेकार (रा. बड्डें, मडगांव), सिद्धेश नायक (राय, कुडटरी) आनी केशव रामगिरी (रा. चांदर,) अशी ह्या दुबावितांची नांवां आसात.
हो हल्लो शेनवारा बाणावलेंतल्या एका हॉटेला भायर रातच्या वेळार जाल्लो. ह्या प्रकरणांत हाचे पयलीं दुबावीत सॅम्युअल मास्कारेन्हास (21, गिरदोली) हो युकेक वचपा खातीर विमानांत बशिल्लो आसतना मोपा विमानतळा वयल्यान पुलिसांनी ताब्यांत घेवन अटक केल्ली. ताका चार दिसांची पुलीस कोठी दिल्या. घडणुके उपरांत वयल्या चारूय दुबावितांच्या विरोधांत गुन्यांव नोंद केल्लो. हातूंतल्या एकल्याक पयलींच अटक केल्ली. उरिल्ले तिनूय दुबावीत आतां कोलवें पुलिसांक शरण आयल्यात. पुलिसांनी तांकां रितसर अटक केल्या.
सॅम्युअल आनी ताच्या इश्टां कडल्यान एका चल्याक मारपेट करीत आसतना आलेक्स बार्रेटो आनी ताच्या इश्टंनी तांकां विचारलें, हेच तिडकींतल्यान मारपेट जाली. हातूंत बार्रेटो हाका गंभीर दुखापत जाल्ली. जाल्यार आंद्रेल डिकॉस्टा, नोव्हीन काल्ड्रीया, मेबन फुर्तादो, गॉर्डन रॉड्रिग्ज हांकां मार बशिल्लो. तशेंच गॅरी रॉड्रिग्ज हाच्या कानाक गंभीर दुखापत जाल्ली. ह्या प्रकरणांतल्या चारूय दुबावितांक कोलवें पुलिसांनी अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
