भांगरभूंय | प्रतिनिधी
भांगरभूंय । प्रतिनिधी
म्हापशेंः फुडाराक कैद्यांक साबार जीण जगपाक मेळची हे खातीर कुशळताय उदरगत माध्यमांतल्यान रोजगार आनी आप रोजगाराची संद कोलवाळ बंदखणीत मेळोवन दिवपाचो सरकाराचो यत्न आसतोलो अशें मुख्यमंत्री डॉ प्रमोद सावंत हांणी सांगलें.
मंगळारा कोलवाळ बंदखणीत संसाधन केंद्राचें उक्तावण केल्या उपरांत ते उलयताले. कार्यावळीक बंदखण म्हानिरीक्षक ओमविर सिंग बिश्नोई, जिनो फोर्मास्युटीकल्साचे दिलीप साळगांवकार आनी हेर अधिकारी हाजीर आशिल्ले ह्या वेळार पत्रांच्या आधारान कांय कैद्यांक आधारकार्डा दिलीं. कोलवाळ बंदखणीक आप रोजगारांत स्वयंपूर्ण करपाचे दिकेन संसाधन केंद्रां सुरू केल्यात. त्या भायर कैद्यांक रोजगार आनी बायल कैद्यांक आप रोजगाराची संद मेळोवन दिवपा खातीर बंदखणींत सॅनेटरी पॅड निर्मणी करपी यंत्रसामुग्रीची वेवस्था केल्या अशें मुख्यमंत्र्यांनी सांगलें.
बंदखणीत गोशाळा उबारल्या. कैदी गोरवांची देखभाल करतले. गोशाळेंत सात गायो आनी एक बैल आसा. कैद्यांक ताजें दूद मेळचें हे खातीर हो उपक्रम आसा. बंदखणींतल्या हातकला केंद्रांत मेस्तकाम, कुमारकाम, कागदी काम, टेलरिंग युनिट हाच्या माध्यमांतल्यान आप रोजगार मेळोवन दितले अशी म्हायती तांणी दिली.
वेसन वा वायक कर्तुबांक लागून कैद्यांच्या हातांतल्यान चूक घडली आसुए मात समाजान तांचे कडेन तेच नदरेंतल्यान पळोवचें न्हय. कैद्यानी आपले मदीं सुदारणा करपाची तयारी दवोरल्या आनी आमी तांचे कडेन सकारात्मक नदरेंतल्या पळयल्यार तांचें मदी सुदारणा जाल्ली दिसतली अशें डॉ सावंत हांणी सांगलें.
हातकला केंद्र, चपाती तयार करपाचें मशीन बंदखणीत उपलब्द करून दिला. जे उपक्रम सुरू केल्यात ते सरकारी खर्चान न्हय जाल्यार सीएसआर येवजणेंतल्यान आसात. तीन म्हयन्यां पयलीं बंदखणीची जापसालदारी पुलीस खात्या कडेन दिल्या. आतां पुलीस म्हानिरीक्षक दर्जाचो अधिकारी बंदखणीचें प्रशासकीय कामकाज सांबाळटा. ताका लागून बरे बदल जाल्यात. फुडाराक हे शिस्तींत आनीक भर पडटली आनी बदल आपसूक दिसतले अशें डॉ सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
