भांगरभूंय | प्रतिनिधी
म्हापशें: कोलवाळच्या 10 मदल्या 9 बेकायदो कावलां अड्ड्यांक उपजिल्होधिकाऱ्याच्या मातयेभरवण करपाच्या आदेशाक प्रशासकी लवादान स्थगिती दिल्या.
गोंय दमण आनी दीव जमीन महसूल कायद्या खाला बार्देस उपजिल्होधिकाऱ्यान कावलां अड्डे कुशीक काडून जमीन पयलीं भशेन हाडपाचो मामलेदाराक निर्देश दिवपी आदेश जारी केल्लो.
प्रशासकी लवादाचे अध्यक्ष द्विजपल पाटकार हांणी हो स्थगितीचो निवाडो दिलो. याचिकादारांच्या वकिलांनी कावलां अड्ड्याचे शेडीक दिल्ली वीज जोडणी तोडल्या. ताका लागून उपजिल्होधिाऱ्याच्या आदेशाक स्थगिती दिवची अशी मागणी लवादा कडेन केल्ली. ते प्रमाण हें बांदकाम मातयेभरवण करपाचो आदेश चुकिल्लो आसून सैमीक न्यायाक धरून ना. ह्या अस्पश्ट न्याय आनी आदेशाची कारवाय आनी अंमलबजावणी फुडल्या आदेशा मेरेन स्थगीत आसा. तशेंच याचिकादारान बांदकाम आनी मालमत्तेचे सुरक्षीततायेचे उपाय करचे अशें ह्या निवाड्यांत नमूद केलां.
कोलवाळ पंचायत आनी हेरांनी केल्ले कागाळीच्या आदारान बार्देस उपजिल्होधिकाऱ्यान सुनावणे वेळार 10 कावलां अड्डे मातयेभरवण करून कुशीक काडपाचो आदेश फाटल्या 13 जानेवारी दिसा जारी केल्लो. ह्या आदेशाचेर कारवाय करपाचे निर्देश मामलेदाराक दिल्ले.
ह्या आदेशाक 9 कावलां अड्ड्यांच्या धनयांनी प्रशासकी लवादा कडेन आव्हान याचिका दाखल केल्ली. जाल्यार अफजल बेपारी हाचो हे याचिकेंत आस्पाव नाशिल्लो.
कारवाये आड आव्हान याचिका दाखल केल्ल्या बेकायदो कावलां अड्ड्यांक पंचायतीन कसलेच तरेचो घर क्रमांक वा परवाने दिल्ले नात. तरी लेगीत कांय जाणांनी लवादा मुखार बांदकामाक बेकायदो घर क्रमांक मेळयिल्ल्याची पावती सादर केली. प्रत्यक्षांत ही पावती भलत्याच बांदकामाक पंचायतीन दिल्ल्याचें दिसून आयलें. हाचे वयल्यान प्रशासकी लवादाची दिशाभूल केल्ल्याचें दिसून आयलें. पंचायतीन अवमान याचिका दाखल करपाची तयारी चलयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
