भांगरभूंय | प्रतिनिधी
कोमुनिदादींक विस्वासांत घेवनूच जातली कायदो दुरुस्ती
पणजी, प्रतिनिधी : कोमुनिदाद जमनींत 70 ते 80 टक्के घरां गोयकारांचीच आसात. कोमुनिदादींक विस्वासांत घेवन कायदो दुरुस्ती करतले आनी हीं घरां वाटावपाची प्रक्रिया जातली, अशें मुख्यमंत्री डॉ. प्रमोद सावंत हांणी सांगलां.
काणकोण, साळगांवां सयत 5 कोमुनिदादींतल्या जमनींतलीं घरां मोडपाचे आदेश न्यायालयान दिल्यात. हीं घरां वाटावपाचें सरकाराचे येत्न आसात. काणकोण कोमुनिदाद जमनींत 500 घरां आसात, अशें डाॅ. सावंत हांणी सांगलें.
कायद्यांत दुरुस्ती करून कोमुनिदाद जमनींतली घरां कायदेशीर करपाची घोशणा डॉ. सावंत हांणी दोन दिसां पयलीं केल्ली. तांचे हे घोशणेचेर विरोधी पक्षांनी खर टीका केल्ली. गोंया भायल्या लोकांची अतिक्रमणां कायदेशीर करपाचो तांचो उद्देश आसा. लोकसभा वेंचणूक लागीं पाविल्ल्यान फक्त मतां खातीर सरकाराची ही धडपड आसा, असो आरोपूय केला.
विरोधकांच्या आरोपांत तथ्य ना. गोंयकारांचीच 70 ते 80 टक्कें घरा आसात, अशें डॉ. सावंत हांणी स्पश्ट केलें.
आयज मंत्रिमंडळ बसका जाली. मंत्रिमंडळ बसके उपरांत मुख्यमंत्र्यांनी ही म्हायती दिली. दिल्ली गोवा सदनात नोकरे खातीर कोकणीचें गिन्यान आसप गरजेचें केलां. हो निर्णय मंत्रिमंडळान घेतला.
प्रधानमंत्री नरेंद्र मोदी हांणी आयज भारत संकल्प यात्रेक सुरवात केली. ही यात्रा राज्यांतल्या दरेकी पंचायतीक भेट दितली. पंचायतींत 3 वरां ही यात्रा रावतली. आयज दक्षीण गोंयांत चिखले पंचायतींतल्यान गोंयांतले यात्रेक सुरवात जातली, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
