भांगरभूंय | प्रतिनिधी
प्रारंभीक बौद्धीक विकासा खातीर आवयभाशेंतलें शिक्षण म्हत्वाचें आसता हो संवसारीक सिद्धांत.
शिक्षणांत कोंकणीचो आस्पाव केल्यार कोणाचें लुकसाण जाता? हाची जाप कोण दिना पूण इंग्लीश कित्याक फायद्याची तें मात सांगतात. गोंयांत प्रशासन इंग्लिशींत चलता, दुसऱ्या राज्यांनी आनी संवसारांत बरेच कडेन प्रशासन आनी वेव्हार इंग्लिशींत जातात, हे खातीर पालक आपल्या भुरग्यांक इंग्लीश शिकयतात अशेंय जायत्या जणांचें म्हणणें आसा. कोंकणी शिकून कितें मेळपाचें आसा? असो प्रस्न करतना कोंकणी आमची आवयभास म्हणपाचें तांच्या ध्यानांत नासता. हाका कारण, तांकां कोंकणी भाशेचो अभिमान ना. जे तरेन आपणा कडेन एक व्हडली गाडी आसा तिचे विशीं व्हडपण सांगतात तितलेंच व्हडपण कोंकणी भाशे विशीं आसूंक जाय. आमचे मदल्या बऱ्याच जणांक तें ना हें आमचें दुर्दैव. म्हणून कोंकणीक शिक्षणांत हाडूंक भौसाचो विरोध जाता.
कांय दीस आदीं हांव एके शिक्षिके कडेन उलयतालों. ती मूळ ओरिसाची पूण नोकरे खातीर गोंयांत आसा. ती म्हणटा आपल्या राज्यांत मुळावें शिक्षण आवयभाशेंतल्यान (उडिया) आसा पूण हांगा मात आपूण विचित्र पळेतां. सगल्यांक इंग्लिशींतल्यान शिक्षण जाय, तातूंत पालकांचो हट्ट चड. मनाक पटनांत असो तीं तर्क सांगतात. मुळावें शिक्षण आवयभाशेंतल्यान घेतलें जाल्यार भाशेची बुन्याद बरी जाता आनी उपरांत दुसरी भास शिकतना ते भाशेचें व्याकरण आनी वाक्यरचना लेगीत सुटसुटीत जाता. गांवगिऱ्या वाठारांतलीं भुरगीं तरी कोंकणी शिकतात पूण शारांतलीं भुरगी विदेशी भासो शिकूंक प्राधान्य दितात आनी नोकरे खातीर कोंकणीची परिक्षा दितना फाटीं पडटात.
गोंयांत 2011 वर्सा एक नवल घडलें. कोंकणी-मराठी शिकोवपी शाळांनी अकस्मात पळटी मारली. पालकांची मागणी, राजकी युक्तीवाद आनी संवसारीक संदींचेर शिक्षणाची जुळोवणी करपाची इत्सा ह्या मिश्रणान सरकारा कडल्यान इंग्लीश शिक्षणाचें माध्यम (एमओआय) करूंक यश मेळ्ळें. हें कशें घडलें तें पळेयात: बरेच व्हड संख्येन पालकांक आपल्या भुरग्यांक इंग्लीश भाशेंत शिकपाची इत्सा आशिल्ली. भुरग्यांनी उंचेली झेप घेवंक, तंत्रगिन्यान आनी परदेशांत रोजगार संद मेळोवंक इंग्लीश गरजेची अशें दिसतालें. ह्याच कारणाक लागून जावये, कोंकणी वा मराठी शिकोवपी शाळांनी विद्यार्थी कमी जावंक लागले आनी इंग्लीश माध्यमांच्या शाळांक अनुदान मागपाचे मागणेन नेट धरलो. सरकाराचेर चेपण आयलें आनी सरकारान इंग्लीश शिकोवपी शाळांकूय अनुदान जाहीर केलें. देखून कोंकणी शिकोवपी डायोसिजन सोसायटीच्या स्कुलांनी आनी हेर शाळांनीय शिक्षणीक धोरण बदल्लें.
हें जालें तें चुकीचें अशें म्हणूंक जावचें ना, कित्याक आमचें धोरणूच चुकीचें आसा. पयली ती चौथी मेरेन तरी कोंकणीतल्यान शिकप सक्तीचें उरिल्लें जाल्यार कितें वांकडें जातलें आशिल्लें? निदान कोंकणी एक विशय बारावी मेरेन सक्तीचो दवरल्यार फायदो जावचो नाशिल्लो? आठवेक तिसरी भास म्हण खंयचीय भास घेवंक सवलत आसा, तिचो फायदो घेवन कितलिशींच गोंयकार भुरगीं कोंकणी सोडून दितात, निमित्त सांगतात ती अवघड लागता. ताचे बराबर हिंदी भास शिकतात, ती आवघड लागना? हें अपचन कारण सोबना.
शिकोवपी जातात तांकां तरी कोंकणी सारकी येवंकूच जाय. कित्याक नव्या शिक्षणीक धोरणा प्रमाण इंग्लिशी बराबर स्थानीक भाशेंत शिकोवप जावंक जाय. हें धोरण चालीक लागलां म्हणटात पूण स्थानीक भाशेंत शिकोवप चालू जालां? चालू जाल्लें जाल्यार ताचो परिणाम तरी कळटलो आशिल्लो. हालींंच्या काळार खूब शिकोवप्यां कडेन संपर्क जाता, तांचे कडेन हांव एक प्रस्न घालतां, तुमी शिकयतना कोंकणी वापरल्यार कितें फायदो जाता. चडावत शिकोवप्यांची सकारात्मक जाप आसता. कोंकणींतल्यान सांगतना तांकां रोखडें समजता आनी कोंकणी भास तांचें लक्ष ओडून घेता. हांव हेंच पटोवन दिवंक सोदतां, कोंकणीचो वापर वर्गांत जालो जाल्यार भुरग्यांचें लक्ष अभ्यासा कडेन येता आनी शिक्षक-विद्यार्थ्यां मदीं लागींचें नातें घडून येता. म्हणून आयच्या युगांत शिकोवप्यांनी तरी कोंकणी बरे भशेन जाणा जावंक जाय.
सरकारान हे गजालीचेर गंभीरतायेन लक्ष घालूंक जाय. इंग्लीश माध्यम आसतना लेगीत कोंकणी कशे तरेन शिकत दवरूंक जाता हाचो अभ्यास जावंक जाय. आतां जेन्ना कोंकणी नोकरे खातीर सक्तीची केल्ली आसा, तेन्ना कोंकणीचें गिन्यान कितले मेरेन आसूंक जाय हें थारिल्लें ना. कांय भुरगीं बारावी मेरेन एक विशय कोंकणी शिकल्यांत पूण उपरांत तांचें कोंकणी कडलें नातें तुटलां आनी तीं वाचूंक बरोवंक घुस्पतात. कित्याक उलोवपा शिवाय तीं कोंकणीचो वापर करिनात. बारावी जातकच तीं कसलेंय शिक्षण घेवंक वचूं, थंय सगले कडेन कोंकणी आसची अशें कितें करूंक जाता काय? गोंया भायलीं भुरगीं जीं गोंयांत रावून शिकल्यांत तीं बेस बरीं कोंकणी उलयतात. गोंयकारांनीय हाचेर गंभीरतायेन विचार करूंक जाय.
प्रारंभीक बौद्धीक विकासा खातीर आवयभाशेंतलें शिक्षण म्हत्वाचें आसता हो संवसारीक सिद्धांत. ताका लागून भुरग्यांक गुंतागुंतीची संकल्पना आत्मसात करूंक, चिकित्सक विचारशक्ती विकसीत करूंक जाता आनी अध्ययनाचे परिणाम अदीक नेटान सुदारूंक शक्य जाता. आवयभाशेंतल्यान शिक्षण घेतल्यार भावनीक सुरक्षीतताय वाडटा, आत्मविस्वास वाडटा, मदींच शिकप सोडपाचें प्रमाण उणें जाता आनी गिन्यानाची अर्थपूर्ण सार्थ उपलब्धताय सुनिश्चीत जाता. हे शिवाय सांस्कृतीक अस्मिताय समजून घेवंक आनी ती तिगोवन दवरूंक आवयभास पुलाचें काम करता. सगलींच विदेशांत वचून नोकरी करिनात, तेन्ना थोड्यांक लागून सगल्यांक एकेच तागडेंत घालप सारकें? आमचे भाशेची व्हडविकाय आमी समजून घेवंक जाय, तिच्या विकासा खातीर वावरूंक जाय. साहित्या वरवीं तिणें संवसार झेप घेतल्या, लोकांच्या काळजांतूय आपलेपणाची आनी व्हडविकेची झेप घेवंक ती रावता.
विन्सी क्वाद्रूस
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
