भांगरभूंय | प्रतिनिधी
डॉ. केतन भाटीकार हांकां सोरोप चाबिल्ल्यान मरण
दांडेली सावन गोंया येतना अनमोड घांटार घडणूक
राजकी आनी वैजकी मळा वयल्यान भाटीकार हांकां आर्गां
भांगरभूंय । प्रतिनिधी
फोंडें : फोंडें मतदारसंघांतल्या विवीध समस्या आड आवाज काडपी डॉ. केतन भाटीकार हांकां फांतोडेर 3 वरांच्या सुमाराक सोबोप चाबिल्ल्यान मरण आयलें. तांच्या आकस्मीक मरणान फोंडें म्हाला वांगडाच पुराय गोंयाक व्हड धपको बसलो. डॉ. केतन भाटीकार हांच्या मरणाची खबर कळटाच फांतोडे सावन आदीं हॉस्पिटलांत आनी उपरांत सकाळ सावन तांच्या घरा कडेन तांच्या बरें मागप्यांची गर्दी जाली. लोकांचे गर्देक लागून सांजे वेळार राजीव गांधी कला मंदिरा फुडल्या रस्त्याचे कुशीक लोकांक कुडीचें दर्शन दिलें. सांजे उसरां वारखंडेचे मसुंडेंत डॉ. भाटीकार हांचे कुडीक अग्नी दिलो.
डॉ. भाटीकार हांच्या मरणाची खबर कळटाच साबार कार्यकर्त्यांनी शुक्रारा फांतोडेर पिळगे भलायकी केंद्रांत धांव घेतली. ते उपरांत शुक्रारा सकाळीं पुलिसांनी पंचनामो करून कूड पोस्टमार्टमा खातीर मडगांवच्या हॉस्पिटलांत दाखल केली. दनपारां पोस्टमार्टमा उपरांत कूड तांच्या घरा व्हेली. त्या वेळार लोकांची खूब गर्दी जाल्ली. मुख्यमंत्री डॉ. प्रमोद सावंत हांचे सयत हेर मंत्री, आमदार आनी हेर राजकी फुडाऱ्यांनी डॉ. भाटीकार हांचे कुडीचे निमाणे दर्शन घेतलें.
फोंडें मतदारसंघांत मनो पक्षाक घटमूट करपांत डॉ. केतन भाटीकार हांचो व्हड वांटो आसा. ते फाटल्या कांय वर्सां सावन समाजकारणांत आनी राजकारणांत सक्रीय आशिल्ले. मगो पक्षाच्या माध्यमांतल्यान राजकी कारकीर्द घडोवपी केतन भाटीकार हांणी सुरवेक भारतीय भाशा सुरक्षा मंचाच्या माध्यमांतल्यान तांणी पणजी विधानसभा वेंचणूक लडयिल्ली. 2022 त मगो पक्षाचे तिकेटीचेर तांणी भाजप फुडारी रवी नायक हांचे आड फोंडें विधानसभा वेंचणूक लडयली. त्या वेळार तांकां फकत 70- 80 मतांनी हार घेवची पडिल्ली. हालींच, फेब्रुवारी 2026 त तांणी काँग्रेस पक्षांत प्रवेश केल्लो. फोंड्याचे भाजपचे ज्येश्ठ तशेंच तेन्नाचे शेतकी मंत्री रवी नायक हांच्या मरणाक लागून रित्या जाल्ल्या फोंडें विधानसभा मतदारसंघाची पोटवेचणूक तांणी लडयली. मात, न्यायालयाच्या आदेशान पोटवेंचणूक मतदानाच्या आदल्या दिसा रद्द केली. ताका लागून आमदार जावपाचें तांचें सपन पुराय जालें ना. फोंडें नगरपालिका आनी कुट्टी- खांडेपार पंचायतीच्या वेंचणुकांनी तांणी नेतृत्व केल्लें. तांच्या ‘रायझींग फोंडें’ हे संघटणेच्या माध्यमांतल्यान दोनूय कडेन सत्ता मेळयल्ली.
ताचे आदीं जिल्हो पंचायत मतदारसंघ लेगीत केतन भाटीकार हांणी एकल्याच्या बळग्यार वेंचून हाडिल्लो. रायझींग फोंडेंच्या माध्यमांतल्यान तांच्या पॅनलान 2023 त पालिका वेंचणूक लडयिल्ली. तांकां चार जाग्यांचेर येस मेळिल्लें. फोंडें मतदारसंघाचे आमदार जावपाचें केतन भाटीकार हांचें सपन आशिल्लें.
लागींचो इश्ट वगडायलो : मुख्यमंत्री
मुख्यमंत्री डॉ. प्रमोद सावंत हांणी डॉ. भाटीकार हांच्या घरा वचून तांच्या घरच्यांक भुजवण दिली. खंयच्याय पक्षांत काम करतालो तरी लेगीत एक सच्चा कार्यकर्तो तशेंच एक लागींचो इश्ट वगडायला, अशें तांणी सांगलें.
लोकांच्या यादींत सदांच उरतले : युरी आलेमांव
डॉ. केतन भाटीकार हे समाजीक कार्या खातीर सेगीत लोकांचे यादींत उरतले. राजकारण आनी समाजीक वावरा भायर तांचें दोतोर म्हूण लेगीत व्हड योगदान आशिल्लें. तांचें आकस्मीक मरण हें धपको दिवपी आसा, अशें काँग्रेस विधीमंडळ फुडारी युरी आलेमांव हांणी म्हणलां.
समाजकारणांत म्हत्वाचें योगदान : पाटकार
डॉ. केतन भाटीकार हांणी पुराय गोंयकारांक रडयले. राजकारणांत नाशिल्लो तरी लेगीत समाजकारणांत म्हत्वाचें योगदान दिल्ले डॉ. भाटीकार हांणी दरेकल्याचें मन जिखिल्लें. तांच्या दुर्देवी मरणाक लागून कार्यकर्त्यांचें तशेंच कुटुंबियांचें व्हड लुकसाण जालां, अशें काँग्रेस प्रदेशाध्यक्ष अमीत पाटकार हांणी सांगलें.
आत्मविस्वास वाडोवपी कार्यकर्तो गेलो : सुदिन
डॉ. केतन भाटीकार हांच्या दुर्दैवी मरणाक लागून दुख्ख जालां. एक आत्मविस्वास वाडोवपी कार्यकर्तो गेलो. मगो पक्षांतल्यान काँग्रेस पक्षांत प्रवेश केल्लो तरी लेगीत केतन भाटीकार हांणी आपल्याक म्हत्वाचें स्थान दिल्लें. मगो पक्षांत आसतना तांणी केल्लें काम कार्यकर्ते केन्नाच विसरपाक शकचे नात, अशें वीज मंत्री सुदिन ढवळीकार हांणी सांगले.
—
डॉ. केतन भाटीकार हांच्या मरणाक लागून म्हाका खूब दुख्ख जाता. नामनेचे फिजीओथेरापिस्ट आशिल्ले डॉ. भाटीकार हांणी उपचार करपा सयत सामाजीक वावर लेगीत केलो.
राहुल गांधी, काँग्रेस फुडारी
—
डॉ. कोतन भाटीकार हांच्या मरणाक लागून राजकारण तशेंच वैजकी मळाचें व्हड लुकसाण जालां.
मल्लिकार्जुन खर्गे, काँग्रेस राष्ट्रीय अध्यक्ष
—
डॉ. केतन भाटीकार हांच्या मरणान गोंय एका बर्या दोतोराक, समाजीक वावुरप्याक आनी राजकारण्याक पयसावला. फकत फोंडें वाठारांत न्हय जाल्यार पुराय गोंयांत तांकां मान आशिल्लो.
अरविंद केजरीवाल, आप राष्ट्रीय संयोजक
—
डॉ. केतन भाटीकार हांचें अचकीत मरण धपको दिवपी आसा. समाजीक वावर करपी आनी राजकारणाचीं व्हड सपनां पळोवपी इश्ट आमचे मदीं ना, हें वास्तव स्विकारपाक बरेंच जड जाता.
राजेंद्र आर्लेकार, राज्यपाल केरळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
