धडपडो फुडारी

भांगरभूंय | प्रतिनिधी

राजकी मळा वयलें एक निसुवार्थी, प्रामाणिक फुडारपण ना जालां.

सतत शिकपी, कितें ना कितें करीत रावपी भुरग्यांक साने गुरूजीन ‘धडपडी मुले’ म्हणलां. डाॅ. केतन भाटीकार हेय तेच तरेचे धडपडे तरणाटे फुडारी. समाजकारण, राजकारणांत ते निमणे मेरेन सुशेग घेनासतना वावुरले, किते ना कितें करीत रावले. अशाच व्यक्तीमत्वांक लोकांचो मोग मेळटा. तांकांय तो मेळ्ळो, मात दीर्घ जीण मेळ्ळी ना. आमदार जातकच लोकां खातीर खूब कितें करपाचें तांचें सपन आशिल्लें. तें अर्दकुटें उरलें. समेस्त गोंयकारांक तांचें मरण चुरको लावन गेलें. तांच्या मरणान, राजकी मळा वयलें एक निसुवार्थी, प्रामाणिक फुडारपण ना जालां. फोंडेंच्याच न्हय, तर राज्यांतल्या मतदारांच्या मनांत तांची याद सदांकाळ उरतली.
निमित्त जालें सोरोप चाबपाचें. काळखांत तांकां घडये दिसूंक ना आसतलें. कांय खिणा भितर तांकां घुंवळ आयली. संकश्ट आयलें, तेंय बी असल्या जाग्यार जंय खिणा भितर वैजकी मजत पावप शक्य नाशिल्लें. अनमोड घांटांतल्यान धारबांदोड्यां हाडटा म्हणसर केतन भाटीकार गेले. वेळ घातकी थारलो. फाटल्या 15 म्हयन्यांत फोंडें मतदारसंघाक बशिल्लो हो तिसरो धपको. लवू मामलेदार, रवी नायक आनी आतां केतन भाटीकार. सगल्यांक 15 तारखेकूच मरण आयलें. अर्थांत हो फक्त योगायोग. भाटीकार हांणी सुरवेक भाशा सुरक्षा मंचा वतीन पणजे वेंचणूक लढयिल्ली. उपरांत फोंड्यां मगो पक्षाचे उमेदवारीचेर. त्या वेळार रवी नायक हांचे आड ते फक्त 77 मतांनी हारिल्ले. फाटल्या नोव्हेंबरांत रवीबाबांक मरण आयलें. उपरांत बऱ्याच तेंपान पोट वेंचणुकेची घोशणा जाली. 9 एप्रीलाक ती जावपाची. भाजपाच्या दोगां वावुरप्यांनी आमदाराक काम करपाक एकूय वर्स मेळचें ना, अशें कारण दाखोवन याचिका घाल्ली. कायद्यान लोकप्रतिनिधीक एक वर्स तरी पदार रावंक मेळपाक जाय. घडये वेंचणूक आयोग हें विसरलो आसतलो. न्यायालयान त्यो याचिका मानून घेतल्यो आनी वेंचणूक रद्द जाली. मगोची उमेदवारी मेळूंक नाशिल्ल्यान भाटीकार काँग्रेसी वतीन उबे राविल्ले. आरजीचोय तेंको मेळिल्लो. राजकारणांत कोण जिखत ताची सदांच खात्री दिवंक मेळना. पूण, केतन भाटीकार जिखतले, अशें जाणकारांक दिसतालें. वेंचणूक रद्द करपाच्या निर्णया आड काँग्रेस सर्वोच्च न्यायालयांत गेल्ली. वेंचणुकेचे नदरेन भाटीकार हांणी तयारीय केल्ली, उदगतीचीं कसलीं कामां करपाचीं, तरणाट्यां खातीर नोकऱ्यो कश्यो तयार करपाच्यो…. ताचोय विचारुय तांणी कांय वावुरप्यां कडेन उक्तायिल्लो. मात तें सपन आतां तांचे वांगडा अनंतात विलीन जालां.
केतन भाटीकार हांचो एक गुण म्हणल्यार म्हऱ्यांत कोणूय आयल्यार तांकां ताची जात- पात, धर्म लागनाशिल्ल्यो. विशेश म्हणल्यार मतदारसंघूय लागनाशिल्लो. ते आपले परीन ताका मजत करताले. फक्त राजकारणूच न्हय, तर खेळां मळाचेरुय ते काम करताले. वेंचणूक हारतकच संबंदीत उमेदवार उणेच चार वर्सां सुशेग घेतात. थोडे पत्रकां काडपा पुरते उठटात. मात, भाटीकार ताका आडवाद. ते पत्रकां, सोशल मिडिया, आंदोलन, समाजसेवा, कार्यावळी, खेळां सर्ती…. सगलेच कडेन कायम जागृत. बरेच लोक कसल्याय कामा खातीर तांकां फोन करताले. सत्तेर नाशिल्ल्या लोकप्रतिनिधी बाबतींत हें क्वचितूच घडटा. आमदार नासतना मरणाक जमिल्लो लोक, भावनाविवश जाल्ले तरणाटे पळयल्यार तांची लोकप्रियता कळटाली. भायर एक भितर एक, अशें तांचें व्यक्तीमत्व नाशिल्लें. हाकाच लागून घडये तांचे फाटल्यान भौस उबो रावलो. कोविडाच्या काळांत तांणी लोकांक खूब मदत केली. फाटलीं सात वर्सां तांणी मुफत अॅम्ब्युलन्स आनी आपलो मुफत वेवस्थापन गट दवरिल्लो. लोकां खातीर 24 वरां ते सक्रीय आशिल्ले.
जो फुडारी स्वता परस सगल्या समाजाचो, सैमाचो, साधनसुविधांचो चड विचार करता, जाचो कारभार पारदर्शक, निसुवार्थी आसता, तोच खरो लोकप्रीय फुडारी. केतन भाटीकाराक आर्गां.