भांगरभूंय | प्रतिनिधी
पंचायतीचो उपक्रम, हांतरुणार आशिल्ल्या दुयेंतींक तपासतले
मडगांव, प्रतिनिधी: केळशी गांवांत कांय दुयेंती खाटी वयल्यान उठपाक शकनात. अश्या हांतरुणाचेर आशिल्ल्या दुयेंती खातीर म्हयन्यांतल्यान एकदां दोतोरांचो पंगड तांच्या घरा वचून भलायकी सेवा दितलो. ही सेवा प्रायोगीक तत्वाचेर सुरु केल्या, अशी म्हायती सरपंच डिक्सन वाझ हांणी दिली. गांवांत हांतरुणाचेर आशिल्ल्या लोकांकूय भलायकी सेवा मेळच्यो देखून केळशी पंचायतीन दक्षीण गोंय जिल्हो हॉस्पिटल तशेंच सिप्ला कंपनीच्या पालवान हो उपक्रम सुरू केला.
सरपंच वाझ हांणी सांगलें, केळशी गांवांत सुमार ४५ दुयेंती हांतरुणार आसात. तांकां हॉस्पिटलांत व्हरप वा उखलपाक २ वा ३ जाणांची गरज पडटा. आतां दोतोर तांच्या घरा वचून भलायकी सेवा दितले. पंचायतीचे स्वयंसेवकूय ह्या कामांत मजत करतले. जे दुयेंती हांतरुणाचेर आसात, जांकां अशक्तपणां आसा, जांकां पळोवपाक कोणूच ना असल्या लोकांक ही सेवा फायद्याची थारतली अशें डिक्सन वाझ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
