भांगरभूंय | प्रतिनिधी
मडगांव: केळशी गांवांतल्या मॉन्सूनपूर्व कामांक एका म्हयन्या फाटींच सुरवात केल्ली. हातूंतलीं चडशीं कामां पुराय जाल्यांत. उरिल्लीं निविदा जाल्ली रस्त्यांचीं आनी गटार बांदपाचीं कामां फुडल्या सप्तकभराच्या काळांत पुराय जातलीं. हाका लागून पावसाच्या दिसांनी लोकांक उदक भरपाचो त्रास जावचो ना अशी म्हायती सरपंच डिक्सन वाझ हांणी दिली.
केळशी गांवांतलीं मॉन्सूनपूर्व कामां पंचायत मंडळा कडल्यान सगल्यांच्या सहकार्यांतल्यान चालीक लायल्यांत. सरपंच डिक्सन वाझ हांणी ह्या कामाचेर स्वता लक्ष दवरलां.
सरपंच वाझ हांणी सांगलें, केळशी ग्रामपंचायती कडल्यान पंचायत वाठारांतल्या मॉन्सूनपूर्व कामांक म्हयन्या भरा सावन सुरवात केल्ली. आतां गांवांतलीं गटारां, नाल्यांतले गाळ, कोयर बी काडिल्लो आसून नितळ केल्यांत. हाका लागून पावसाच्या दिसांनी गांवांतल्या लोकांक उदकाचो त्रास जावचो ना. गटारांचे नितळसाणेक लागून रस्त्यार उदक सांठून उरपाचे प्रकार जावचे नात. तशेंच गांवांतल्या शेतांतल्या बांदाची बांदणी केल्या. सुमार 1200 मिटर लांबायेच्या शेतांतले बांद बांदल्यात.
व्हड्यां खातीर आशिल्ल्या वाठारांतले न्हंयेचे कुशीचो गाळ काडला आनी उदकाचो मार्ग मेकळो केला. तशेंच गांवांतल्या 8 ते 9 तळ्यांतल्या गाळ काडून नितळ केल्यात. सैमीक उदकाच्या स्रोतांची नितळसाण करपाच्या उपक्रमांतल्यान गांवांतल्या बांयांतले गाळ काडून नितळ केल्यात. तशेंच सप्तकभरांत आनीक सात ते आठ कामां आसात. जांच्यो निविदा काडल्यात. तांची सुरवात रोखडेच करतले. हातूंत तीन सुवातांनी रस्त्यांची दुरुस्ती, एक नवो रस्तो जाल्यार एके कडेन गटारांची दुरुस्ती करपाची कामां आसात अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
