भांगरभूंय | प्रतिनिधी
केरी गांवाचेर पातळ्ळी दुख्खाची सया
वाळपय: व्हाळवाट न्हंयेच्या पात्रांत न्हावपा खातीर गेल्ल्या केरी सत्तरी हांगाचो दिपेश महादेव गांवस ह्या 16 वर्सां पिरायेच्या तरणाट्याक बुडून मरण येवपाचो प्रकार काल (आयतारा) सकाळीं घडलो. हे खातीर केरी गांवाचेर दुख्खाची सया पातळ्ळ्या.
हे विशीं मेळिल्ले म्हायती प्रमाण दीपेश नामदेव गांवस आपल्या सोयर्यां बराबर व्हाळवाट न्हंयेच्या पात्रांत न्हावपा खातीर गेल्लो. न्हाता आसतना तो अचकीत बुडलो. ह्या वेळार ताचे बराबर आशिल्ल्या सोयर्यांनी ताका वाटावपाचो यत्न केलो. पूण तो अयेसस्वी थारलो. हे विशींची म्हायती गांवांत पातळटकूच लोकांनी व्हड प्रमाणांत घडणूक थळार धांव घेवन ताची कूड उदकांतल्यान भायर काडली आनी उपचारा खातीर सांखळी सरकारी समाजीक हॉस्पिटलांत दाखल केलो. पूण वैजकी अधिकार्यांनी ताका मरण आयिल्ल्याचें जाहीर केलें.
दीपेश गांवस हो केरी सरकारी माध्यमीक विद्यालयाचो धावेचो विद्यार्थी आशिल्लो. हालींच ताणें धावेची परिक्षा दिल्ली. फुडल्या काय दिसांनी हे परिक्षेचो निकाल येवपाचो आसा. ह्या निकाला पयलींच काळान ताचेर घालो घालो. वाठारांत हे घडणुकेक लागून दुख्ख उक्तायतात.
मजगतीं, हे विशींची म्हयाती मेळटकूच पुलिसांनी घडणूक थळार धांव घेवन घडणुकेचो पंचनामो केलो. सद्या कूड गोंय वैजकी म्हाविद्यालयांत मरणा उपरांतचे तपासणे खातीर धाडून दिल्या. आयज (सोमारा) ही प्रक्रिया पुराय जावन उपरांत कूड कुटुंबाचे सुवादीन करतले अशी म्हायती मेळ्ळ्या.
मजगतीं, गरमेचें प्रमाण व्हड प्रमाणांत वाडिल्ल्यान लोक न्हंयांनी न्हावपा खातीर वतात. ताका लागून हालींच्या काळांत अशे प्रकार वाडूंक लागल्यात. जे सुवातेर ही घडणूक घडली ते सुवातेर पेंवपाक येनाशिल्ल्यांनी ही सुवात घातक आशिल्ल्याची म्हायती थळाव्या लोकांनी दिल्या. शेनवार आनी आयतार ह्या दोन दिसांनी लोक व्हड प्रमाणांत हे सुवातेर न्हावपा खातीर येतात अशी म्हायती थळाव्या लोकां कडल्यान मेळ्ळी.
दीपेश गांवस हांचे फाटल्यान व्हड भयण, ल्हान भाव, आवय-बापूय आनी आजो-आजी असो घराबो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
