केरळांत प्रार्थना सभेंत स्फोट, एकल्याक मरण 40 जखमी

भांगरभूंय | प्रतिनिधी

कोची, खबरां संस्था : कालमासेरी- एर्नाकुलम (केरळ) शारांतल्या जिहोवा प्रार्थना केंद्रांत 3-4 बाॅम्बस्फोट जावन एकल्यार मरण. तर 40 जखमी. हातूंतले कांय जाणांची भलायकी हुस्क्याची आसा. मुख्यमंत्री पिनाराय विजयन हांणी चवकशीचे आदेश दिल्यात. हो अतिरेकी हल्लो असो अदमास कांय जाणांनी उक्तायला.
जेहोवा विटनेस कन्वेन्शन सुरू आसतना आयतारा सकाळीं हे स्फोट जाले. ह्या वेळार 2000 लोक हाजीर आशिल्ले. सहायक पुलीस आयुक्त बेबी पीव्ही हांणी सांगलें, एक न्हय, 3- 4 स्फोट जाल्ल्याचें कळ्ळां. कांय लोक अत्यवस्थ आसात. हो बाॅम्बस्फोट काय आनीक कितें ताची चवकशी आमी करतात. आतां परिस्थिती नियंत्रणा खाला आसा.
जिहोवा विटनेस हो क्रिश्चना सारकोच वेगळो गट. केरळांत सुरू आशिल्ली ही प्रादेशीक प्रार्थना सभा म्हूण लोकप्रीय आसा. वर्सांतल्यान एक दीस शुक्रार ते आयतार मेरेन ती जाता. तातूंत बायबलाचेर (ओल्ड टेस्टामेंट) आदारीत व्याख्यानां, नाटकुलीं आनी व्हिडियो दाखयतात.

गुप्तचर संस्थांनी कांय खबरां चॅनलांक दिल्ले म्हायती प्रमाण, हो आतंकवादी हल्लो हें स्पश्ट दिसता. जिहोवा समुदाय हो ज्युदेवां सारको जिहोवा वा येहोवा ह्या देवाक मानतात. तांचो इस्रायलाक तेंको आसा, अशें एकल्यान सांगलें.
शेनवारा हमास फुडारी खालीद मशाल हाणें व्हर्च्युअल पद्दतीन लोकां मुखार भाशण केल्लें. हांगाच्या इस्लामिक संघटनांनी निशेध सभा आयोजीत केल्ली. तातूंत हें भाशण जाल्लें. हाचो बाॅम्बस्फोट घडणुके कडेन कितें संबंद आसा काय कितें ताचो तपास केरळाचे पुलीस आनी गुप्तचर यंत्रणा करता.
जिहोवास व्हिटनेस हो गट अमेरिकेंत 1870 त स्थापन जालो. संवसारभर तांचे 80 लाख 70 हजार अनुयायी आसात.