भांगरभूंय | प्रतिनिधी
कामाचें स्रय घेवपाक सद्याचो आनी आदलो आमदार मुखार
केपें: केपें बाजारांत रस्त्याच्या हॉटमिक्स डांबरीकरण कामाचो शुभारंभ जालो. ह्या कामाचें स्रय मात आदलो आमदार आनी सद्याचो आमदार हांणी घेवपाचो यत्न केल्ल्याचें दिसून आयलें.
केपें मतदारसंघांत पालिका वाठारांनी आनी पंचायत वाठारांनी रस्त्याचीं हॉटमिक्स डांबरीकरणाचीं कामां सुरू आसात, आनी दर एका कामाच्या शुभारंभा वेळार आदलो आमदार आनी सद्याचो आमदार कामाचे स्रय घेवपाचो प्रकार दिसून येता.
काल (शुक्रारा) केपें पालिका बाजारांत रस्त्याच्या हॉटमिक्स डांबरीकरण कामाचो शुभारंभ सुवाळ्याक केपेंचे आमदार एल्टन डिकॉस्टा, आदले उपमुख्यमंत्री चंद्रकांत कवळेंकार, नगराध्यक्ष सुचिता शिरवयकार, नगरसेवक दयेश नायक, अमोल काणेकार, चेतन हळदणकार, दिपाली नायक, जेकिना डायस आनी हेर मानेस्त हाजीर आशिल्ले.
ह्या वेळार आदल्या आनी सद्याच्या आमदारांनी आपल्या भाशणांतल्यान रस्त्याच्या कामाचो स्रय घेवपाचो यत्न जालो.
ह्या वेळार चंद्रकांत कवळेंकारान म्हणलें, हे काम आपले कारकिर्दीत करून घेतिल्लें. तशेंच ह्या कामा बरोबर मतदारसंघाचो विकास करपा खातीर मुख्यमंत्री प्रमोद सावंत हांचें सहकार्य मेळ्ळें.
आमदार एल्टन डिकॉस्टान म्हणलें, खूबशे फावटी उल्लेख जाता की कामां आपणें केल्यात. हांव 10 मार्च 2022 दिसा आमदार जाले उपरांत ह्या कामाची निविदा 23 मार्च 2022 दिसा जाली आनी वर्क ऑर्डर 31 मार्च 2023 दिसा दिली अशें सांगून रस्त्याच्या कामाचें स्रय घेतलें. तशेंच कांय कामां आडावपाचोय यत्न जायत आसा अशी टिकाय केली. ह्या वेळार लोकांक मात हॉटमिक्स कामाचे स्रय सद्याचो आनी आदलो आमदार घेत आशिल्ल्याचें दिसून आयलें. लोकांची मात बरीच मनरिजवण जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
