भांगरभूंय | प्रतिनिधी
भांगरभूंय । प्रतिनिधी
मुरगांवः राज्याचे उदरगती खातीर केंद्र सरकार तरेकवार प्रकल्प चालीक लायता. मात कांय लोकांक तांकां विरोध करपाचे फकत निमीत्त लागता. लोकशाय प्रधान देशांत विरोध करतल्यांक कोणूय आडावपाक शकनात. मात केंद्र सरकाराच्या प्रकल्पांक विरोध करप सारकें न्हय. तशेंच विरोध केलो म्हणून हे प्रकल्प बंद पडनात, अशें केंद्रीय बंदर, बोट परिवहन आनी उदका मार्ग राज्यमंत्री श्रीपाद नायक हाणे सांगलें.
मुरगांव- सडा हांगा मुरगांव बंदर प्राधिकरणाचे प्रशासकीय इमारतीच्या आवाठांत संवसारीक पर्यावरण दिसा निमतान रोपे लायले उपरांत ते उलयताले. ह्या वेळार तांच्या वांगडा एमपीएचो अध्यक्ष डॉ. एन विनोद कुमार, उपाध्यक्ष गुरुप्रसाद राय, सचीव एस.पी. मोहन कुमार, येरादारी वेवस्थापक कॅप्टन. हिमांशू शेखर, वरिष्ठ उप येरादारी वेवस्थापक जेरॉम क्लेमेंत, जनसंपर्क अधिकारी तरन्नूम हवालदार, कॅप्टन. मनोज जोशी आशिल्ले. सागरमाला खाला केंद्र सरकारान वेगवेगळ्या प्रकल्पांचें काम करपाचें येवजिलां. मुरगांव बंदरांतल्या प्रदूशणाचेर नियंत्रण हाडपा खातीर एमपीए सगले तरेची उपाय येवजण करतलें अशी म्हायती नायक हांणी दिली. पर्यावरणाची राखण हें दरेकल्याचें काम आसा. वाडटे गरमेचे नियंत्रण दवोरपा खातीर झाडां लावपाची गरज आसा अशें तांणी सांगलें.
मुरगांव बंदर प्राधिकरणान हवामान उदिश्टां हातासपा खातीर हरित सागरा खाला मुरगांव बंदराच्या वाठारांत पांच हजार झाडां लावपाचें थारायलां. वापरल्ल्या उदकाचेर प्रकल्पाचेर प्रक्रिया करून तें नितळ करपाचो यत्न राज्य मलनिस्सारण उदरगत म्हामंडऴा वतीन करतले. हें उदक झाडां खातीर वापरतले. सोलर पॉवर प्रकल्प उबारतले. पर्यावरणाची संतुळा राखपा खातीर पॅरामीटर उबारतले, मुरगांव बंदरांत कोळसो हाताळणे खातीर शेड बांदतले अशी म्हायती एमपीएचो अध्यक्ष डॉ विनोद कुमार हांणे दिली. हे कार्यावळींत श्रीपाद नायक हाणे हाजीर आशिल्ल्या सगल्या अधिकाऱ्यां कडल्यान पर्यावरण राखण करपाचो सोपूत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.