कुस्तीपटूंच्या आंदोलनाचेर टिकेत हांचो केंद्र सरकाराक अल्टिमेटम

भांगरभूंय | प्रतिनिधी

9 जून मेरेन बृजभूशणाक अटक करात,
नाजाल्यार जें घडटलें ताका सरकार जापसालदार

खबरां संस्था
नवी दिल्लीः भारतीय कुस्ती म्हासंघाचे मावळटे अध्यक्ष बृजभूषण शरण सिंह हांचे विरोधांत फाटल्या म्हयन्योपरा पसून कुस्तीपटू आंदोलन करतात. ह्या अांदोलनाक तेंको वाडत आसा. काल सेगीत दुसऱ्या दिसा कुरूक्षेत्रांत खाप म्हापंचायत जाली. म्हापंचायत जाले उपरांत शेतकार फुडारी राकेश टिकेत हांणी सरकाराक अल्टिमेटम दिला. 9 जून मेरेन बृजभूषण सिहाक अटक करपाची मागणी तांणी केल्या. ते उपरांत जे कितें घडटले ताची जापसालदारकी सरकाराचेर आसतली, अशी शिटकावणी तांणी दिल्या.
हाचे पयलीं बिरेस्तारा 1 जूनाक उत्तर प्रदेशांतल्या मुझफ्फरनगरांत म्हापंचायत जाल्ली. मात ह्या वेळार कसलोच प्रस्ताव मंजूर करूंक नाशिल्लो. पूण काल 2 जूनाक जाल्ले म्हापंचायती उपरांत राकेश तिकेट हांणी म्हणलें, बृजभूषण सिंहाक अटक करची हाचे आमी ठाम आसात. नाजाल्यार 9 जून उपरांत कुस्तीपटूंक जंतर-मंतराचेर सोडून आनी देशभरांत पंचायत आयोजीत करतले, अशें तांणी म्हणलें.
काल जाल्ले खाप म्हापंचायतींनी पंजाब, हरयाणा, राजस्थान आनी दिल्लींतल्या खाप पंचायतींनी वांटो घेतिल्लो.