कुडीची तशेंच मानसीक तपासणीय म्हत्वाची

भांगरभूंय | प्रतिनिधी

ज्योशुआ डिसोझा: मानसीक भलायकी दिसा निमतान जनजागृताय कार्यावळीचें आयोजन

म्हापशें: समुपदेशना विशीं लोकां मदीं व्हड प्रमाणांत गैरसमज आसात. मानसीक संतुलन इबाडिल्ल्यान उपचार घेतल्यार खूबशा जाणांक तो मनीस पिसो अशें दिसता. मदेकांत तीन ते चार म्हयने हांवें लेगीत समुपदेशन घेतलां. जितली कुडीची तपासणी म्हत्वाची तितलीच मानसीक तपासणी लेगीत म्हत्वाची आसा अशें उपसभापती ज्योशुआ डिसोझा हांणी सांगलें.

मंगळारा जिल्हो मानसीक स्वास्थ कार्यावळ आनी म्हापशें उत्तर जिल्हो हॉस्पिटलान संवसारीक मानसीक भलायकी दिसा निमतान जनजागृती कार्यावळीचें आयोजन हांगासरल्या नागरी भलायकी केंद्रांत आयोजीत केल्लें. हे कार्यावळींत मुखेल सोयरे म्हूण ते उलयताले.

ह्या वेळार नगराध्यक्ष प्रिया मिशाळ, डॉ. राजेश धुमे, डॉ. शाहीन सय्यद, डॉ. तन्वी पेडणेंकार माचयेर हाजीर आशिल्ले. तशेंच उपनगराध्यक्ष विराज फडके, नगरसेविका शुभांगी वायंगणकार, डॉ. नूतन बिचोलकार ह्यो लेगीत कार्यावळींत हाजीर आशिल्ल्यो.

उपसभापती ज्योशुआ हांणी म्हणलें, मानसीक संतुलना विशीं आयज लेगीत खूबशे जाण जागृत नात. मानसीक स्वास्थ इबाडलें म्हणल्यार दुयेंतीक मानसीक हॉस्पिटलांत बांदून घालतले अशेंच कांय जाणांक दिसता. पूण दरेक दुयेंस हें वेगळें आसून लोकांनी मानसीक स्वास्था कडेन पळोवपाचो दिश्टीकोन बदलूंक जाय

2013-14 वर्सा म्हाका तिडक चड येताली. त्या वेळार घरच्यांनी म्हाका समुपदेशन घेवपाक सांगिल्लें. ताका लागून सुमार तीन म्हयने सप्तकांतल्यान एक दीस हांव समुपदेशनाक वतालों. हातूंतल्यान म्हज्या राजकी तशेंच दीसपट्ट्या आयुश्यांत बरोच बदल जालो अशें ज्योशुआन म्हणलें.

ह्या वेळार डॉ. राजेश धुमे हांणी लेगीत मानसीक संतुलन कशे तरेन सांबाळूंक जाय हाचेर विस्तारान म्हायती दिली.

मानसोपचारतज्ञ डॉ. तन्वी पेडणेंकार हांणी म्हणलें, तणाव, चिंता, स्क्रिझोफ्रेनिया, निरशेवणी हे कांय प्रमाणांत मानसीक स्वास्था कडेन निगडीत प्रस्न आसात. ते खातीर समुपदेशन घेवंक जाय. आपल्या मनांत कांयच सांचून दवरिनासतना लागसारच्या मनशा कडेन स्टिग्मा म्हूण कोणें पळोवचें न्हय. सगल्यांचे जिणेंत तणाव आसता. तणाव आशिल्ल्यान आपूण आपलें कार्य वेळांत पुराय करूंक शकता. पूण हो तणाव चड जायत जाल्यार दोतोराचो सल्लो घेवचो.