भांगरभूंय | प्रतिनिधी
तीन दुचाकीं सयत, टीव्ही, लॅपटॉप घरांतले साहित्य उज्याचे भकीक
मडगांव: कुडटरे सोमारा फांतोडेर 5 वरांच्या सुमाराक कायतान मिंगेल डिसिल्वा (69) हांच्या घराक उजो लागलो. हातूंत तीन दुचाकीं सयत टीव्ही, लॅपटॉप आनी घरांतलें साहित्य उज्याचे भकीक पडिल्ल्यान सुमार 7 लाखांचें लुकसाण जालें. घर धनी कायतान हांचे हात, पांय उज्यांत लासले. मडगांव उजो पालोवपी दळाक 10 लाखांची मालमत्ता वाटावपाक येस आयलें.
मडगांव उजो पालोवपी दळाचे अधिकारी गील डिसोझान दिल्ले म्हायती प्रमाण, कुडटरी हांगासरल्या टीबी हॉस्पिटला कुशीक आशिल्ल्या कायतान मिंगेल डिसिल्वा हांच्या घराक फांतोडेर 4.58 वरांचेर उजो लागपाची घडणूक घडली. ह्या घरांत कायतान आनी तांची घरकान्न रोझी हीं दोगांच रावतालीं. घराचे वटेन आशिल्ल्या स्टोर रुमाकूय उजो लागिल्लो. तशेंच घरा भायर उब्यो केल्ल्यो पल्सर, प्लेझर आनी चेतक अश्यो तीन दुचाकी उज्याचे भकीक पडल्यो.
मडगांव उजो पालोवपी दळाचे जवान घडणूक थळार पावतकूच उदकाचो मारो सुरू केलो. घरांतल्या चारूय कुडींनी उजो पातळिल्लो. जवानांनी किचनांतल्यान दोन सिलिंडर भायर काडले. जाल्यार घर धनी कायतान हांकां घेवन आलमारींतल्यो भांगराच्यो वस्ती वाटावपाक येस आयलें. घराचे लांकडी पाखें लासून गेलें. उजो पालोवपी दळा कडल्यान तीन बंबाच्या उदकाचो मारो करून घराक लागिल्लो उजो आटापा हाडलो.
बाणावले दर्यादेगेर किओस्काक उजो
कुडटरे घराक उजो लागलो त्याच वेळार 5.10 वरांचेर बाणावले दोन किऑस्काक उजो लागपाची घडणूक घडली. मडगांव उजो पालोवपी दळान आनीक बंब आपोवन थंय बंब उपलब्ध केलो आनी उज्याचेर नियंत्रण मेळयलें. किऑस्काचें 3 लाखांचें लुकसाण जाल्ल्याची म्हायती उजो पालोवपी दळान दिली.
घर धनी उज्यांत जखमी
कुडटरे घराक लागिल्लो उजो नेमको कित्याक लागून लागलो हाचें कारण कळ्ळें ना. घर धनी कायतान हांचो हात आनी पांयाचो भाग उज्यांत लासलो. अॅम्बुलन्स आपोवन तांकां बांबोळे उपचारा खातीर धाडून दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.