भांगरभूंय | प्रतिनिधी
मडगांव: कुंकळ्ळे गुलाकट्टो वाठारांत शुक्रारा रातीं अनवळखी वाहनान सनी शिरोडकार (39, रा. माडेकट्टो) हाचे दुचाकीक धपको दिवन पळ काडलो. उपचारा वेळार सनी हाका मरण आयिल्लें. ह्या प्रकरणांत कुंकळ्ळी पुलिसांनी दुबावीत देविदास मयेंकार हाका अटक केल्या. अपघातांतलें वाहन लेगीत जप्त केलां.
शुक्रारा 15 डिसेंबर दिसा रातीं इकरा वरांच्या सुमाराक कुंकळ्ळे आयडीसी कुशीक गुलाकट्टो वाठारांत ही घडणूक घडली. सनी शिरोडकार हो रातीं सुमार इकरा वरांचेर जेवणाचें पार्सल घेवन स्प्लेंडर दुचाकीन घरा वतालो. त्या वेळार कुंकळ्ळी सावन कुंकळ्ळी आयडीसीची दिशेन वचपी मोटारीन एका व्हड ट्रेलराक ओव्हरटेक करपा वेळार ताका धपको दिलो आनी घडणूक थळा वल्यान पळ काडलो.
ह्या अपघातांत सनी हाचे तकलेक गंभीर दुखापत जाली. ताका दक्षीण गोंय जिल्हो हॉस्पिटलांत उपचारा खातीर व्हेलो. पूण उपचारा वेळार ताका मरण आयलें. कुंकळ्ळी पुलिसांनी अनवळख्या आड गुन्यांव नोंद करून तपास केलो.
ह्या प्रकरणांत सोमारा देविदास मयेंकार ह्या दुबाविताक अटक केली. दुबावीत देविदास हो विरोधी पक्ष फुडारी युरी आलेमांव हांचो चालक आसा. जाल्यार ही अपघातांत सांपडिल्ली गाडी युरी आलेमांव हांच्या आवयच्या नांवार नोंद आसा. जी सद्या चालक देविदास मयेंकार हो चलयतालो. दुबावितान अपघातांत वापरिल्ली मोटार पुलिसांनी जप्त केल्या.
ह्या प्रकरणांत पुलीस निरिक्षक डायगो ग्रासीयस हांच्या मार्गदर्शना खाला पुलीस उपनिरिक्षक कविता रावत ह्या प्रकरणाचो फुडलो तपास करतात.
देविदास मयेंकार हो दुबावीत विरोधी पक्ष फुडारी युरी आलेमांव हांचो चालक आसा. ताचे अटके उपरांत युरी आलेमांव हांणी समाजमाध्यमांचेर ह्या अपघाताची मरणा विशीं दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
