भांगरभूंय | प्रतिनिधी
उजो पालोवपी दळान पुलिसांक सांगलां तपास करपाक
फोंडें: ढवळे कावला अड्ड्याक लागिल्लो उजो पालोवपाक उजो पालोवपी दळाच्या कर्मचार्यांक येस आयलें. पूण उजो लागपाचें कारण अजून समजल्लें ना. उजो लागपाचें कारण सोदपा खातीर उजो पालोवपी दळान पुलिसांक पत्र धाडून तपास करपाक सांगलां. पुलीस चवकशेंत उजो लागिल्ल्याचें कारण स्पश्ट जातलें. उज्यांत सुमार शेंकड्यांनी रुपयांचें लुकसाण जाल्ल्याचो मुळावो अदमास उक्तायतात.
फाटल्या शुक्रारा दनपारां जेवणा वेळार अचकीत कावला अड्ड्याक उजो लागिल्ल्याचें कामगारांनी पळयलें. ताचे पयलीं कावला अड्ड्याचे कुशीक अनवळख्यांनी उजो लायिल्ल्याची म्हायती कामगारांनी दिली. ताका लागून उजो नेमको कसो लागलो हाचो सोद घेवपा खातीर फोंडें उजो पालोवपी दळान फोंडें पुलिसांक उजो लागपाचें कारण सोदपा खातीर पत्र धाडलां.
पुलीस तपास केले उपरांत उजो लागपाचें कारण स्पश्ट जातलें. कावला अड्ड्यांत सुमार 25 परस चड कर्मचारी फाटल्या कितल्याशाच वर्सां सावन कामाक आशिल्ले. उजो लागपाचें कारण अजून स्पश्ट जाल्लें ना. पूण पुलीस तपासांत चित्र स्पश्ट जावपाची शक्यताय उक्तायतात.
फोंडें उजो पालोवपी दळाचे अधिकारी सुशील मोरजकार हांणी हे विशीं अदीक म्हायती दितना उज्याचें कारण सोदपा खातीर पुलिसांक पत्र धाडून चवकशी करपाचे आदेश दिल्यात. पुलिसां कडल्यान अहवाल आयले उपरांत उजो लागपाचें कारण स्पश्ट जातलें अशें तांणी सांगलें.
मजगतीं, ढवळे ह्या कावला अड्ड्याक शुक्रारा दनपारां 12.30 वरांच्या सुमाराक उजो लागिले. गोंयभरच्यान उजो पालोवपी दळाचे बंब दाखल जाल्ले. शुक्रारा रातभर उजो पालोवपी दळाच्या जवानांनी उज्याचेर नियंत्रण दवरपाचो यत्न केल्लो.
रान खात्याच्या कर्मचार्यांनी लेगीत दोंगराळ वाठारांत लागिल्ल्या उज्याचेर नियंत्रण दवरपाक येस मेळयिल्लें. शेनवारा सकाळ सावन उजो पालोवपी दळाचे संचालक नितीन रायकार, राजेंद्र हळदणकार, सुशील मोरजकार आनी हेर अधिकारी स्थितीचेर लक्ष दवरून आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
