भांगरभूंय | प्रतिनिधी
प्रदुशण मंडळ, पुलीस, उजो पालोवपी दळ, भलायकी खातें हांकां भेटयतले निवेदनां
कावला अड्डे बंद करचे, नाजाल्यार देंवतले रस्त्यार; थळाव्या लोकांचो बसकेंत निर्णय
फोंडें: ढवळे फाटल्या शुक्रारा कावला अड्ड्याक लागिल्ल्या उज्याक लागून थळाव्या लोकांक घात निर्माण जाला. ताका लागून प्रदुशण मंडळ, पुलीस, उजो पालोवपी दळ आनी भलायकी खात्याक निवेदनां दितले. तशेंच शुक्रारा जावपी सुनावणे वेळार ग्रामस्थांच्यो सयो घेवन कावला अड्डे बंद करपाची विनंती उपजिल्होधिकार्यांक करची. जर कावला अड्ड्यार कारवाय करपाक असमर्थ थारल्यार रस्त्यार देंवपाचो निर्णय काल (बिरेस्तारा) सांजवेळा जाल्ले बसकेंत थळाव्या लोकांनी घेतलो.
सरपंच मनुजा नायक हांच्या मार्गदर्शना खाला सांजवेळा खासा बसका घेतली. त्या वेळार पंचायतीचे कायदो सल्लागार अॅड. सुरेल तिळवे, उपसरपंच सुशांत कपिलेश्वरकार, पंच सोनाली तेंडुलकार आनी हेर पंच आनी ग्रामस्थ हाजीर आशिल्ले.
ढवळे कावला अड्ड्याक लागिल्ल्या उज्याक लागून गोंयांतल्या खूबशा लोकांक गरजे भायर त्रास सोंसचो पडलो. बेकायदो सुरू आशिल्ले कावला अड्डे कायमचे बंद करपाची मागणी प्रलंबीत आसा. लोकांचे सुरक्षे खातीर कावला अड्डे बंद करपाची गरज आसा. नाजाल्यार फुडारांत परतून अशी घडणूक घडून थळाव्या लोकांक घात जावंक शकता. हे संबंदी आयज (शुक्रारा) उपजिल्होधिकारी कचेरेंत सुनावणे वेळार लोकांचो निर्णय पंचायतीन कळोवपाची गरज आसा. कावला अड्ड्यार कायदेशीरपणान कारवाय जाली ना जाल्यार रस्त्यार देंवून आंदोलन करपाचो निर्णय बसकेंत घेतलो.
सरपंच मनुजा नायक हांणी फाटल्या कितल्याशाच वर्सां सावन पंचायत मंडळ बेकायदो सुरू आशिल्ल्या कावला अड्ड्या आड लढो दीत आसा. नव्या मंडळान लेगीत कारवाय करपा खातीर फाटल्या म्हयन्यांत पळोवणी करून नोटिसी दिल्ल्यो. शुक्रारा जावपी सुनावणेंत ग्रामस्थांनी घेतिल्लो निर्णय उपजिल्होधिकार्यांक कळयतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
