भांगरभूंय | प्रतिनिधी
म्हापशें: कामरखाजन, म्हापश्यां बांयांचें उदक आटपा फाटल्यान मलनिस्सारण प्रक्रिया प्रकल्पाचे चांचणे कडेन कसलोच संबंद ना असो दावो उपसभापती ज्योशुआ डिसोझा हांणी केला.
खोर्ले भितरल्या रस्त्यांच्या डांबरीकरणाच्या कामाचो शुभारंभ केले उपरांत उपसभापती पत्रकारां कडेन उलयताले. ह्या वेळार नगराध्यक्ष प्रिया मिशाळ, नगरसेविका शुभांगी वायंगणकार आनी हेर मानेस्त हाजीर आशिल्ले.
भुंयगत वीज वाहिनी घालपाचें काम पुराय करप आनी घाणयारें उदक प्रकल्पाची घर जोडणी दिवप हीं कामां आपले खातीर सर्वोच्च आसात. कामरखाजनांतल्या मलनिस्सारण प्रकल्पाची चांचणी हाचे पयलींच जाल्या. हे चांचणेच्या अहवालाची वाट पळयतात. भुंयगत वीज वाहिनी आनी मलनिस्सारणाची जोडणी पुराय करपाचे सद्या आपणें लक्ष केंद्रीत केलां अशें डिसोझान सांगलें.
कामरखाजन आनी आकयंतल्या बांयांतल्या उदकाची पातळी उणी जावपाच्या प्रकल्पाचे चांचणे कडेन संबंद ना. ह्या वाठारांतले चेंबर्स अजून प्रकल्पाक जोडपाचे आसात. पयल्या टप्प्यांत फक्त गांवसवाडो, आंगड हांगासरल्या घरांक जोडणी दितात. ताका लागून कामरखाजन आनी आकय वाठार ह्या प्रकल्पाक जोडूंक नाशिल्ल्यान थंयच्यो बांयो सुकतल्यो हें म्हाका दिसना अशेंय डिसोझान म्हणलें.
मजगतीं, भुंयगत वाहिन्यो घालपाच्या कामाक लागून सद्या मिलाग्रीस चर्च ते टॅक्सी स्टॅण्ड ह्या मुखेल रस्त्यों हॉटमिक्सींग आडावन उरलां. हें हॉटमिक्सिंगेचें काम दोन वर्सां प्रलंबीत आसा. हें काम पावसा पयलीं हातांत घेतले अशें उपसभापतीन म्हणलें.
फाटल्या सप्तकांत कामरखाजनांतल्या मलनिस्सारण प्रकल्पाचे चांचणेक लागून बांयांचें उदक आटलां असो दावो रहिवाश्यांनी केल्लो आनी हें काम बंद उडयिल्लें. थळाव्या आमदारांच्या सहाय्यान रहिवाशयांची अधिकार्यां बरोबर जोड बसका घेतिल्ली. त्या वेळार अधिकार्यांनी चांचणीचें काम हातांत घेतिल्लें हाची कबुली दिल्ली. तशेंच भुगर्भांतलें उदक उणें जावपाचें कारण सोदून काडपा खातीर अभ्यास सुरू आशिल्ल्याची म्हायती दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
