भांगरभूंय | प्रतिनिधी
भांगरभूंय । प्रतिनिधी
म्हापशेंः कामरखाजन- म्हापशें हांगच्या मलनिस्सारण प्रकल्पाचे चांचणेचें काम हातांत घेतिल्ल्यान वाड्या वयल्या लोकांच्या बांयेतल्या उदकाची पातळी देंवल्या तशेंच वर्सभर व्हांवपी वझरे लेगीत आटल्यात. ताका लागून उदकाच्या उणावाक लोकांक तोंड दिवचें पडटा.
ह्या वाड्यार आशिल्ल्या 14 बांयांतल्या उदकाची पातळी अर्द मीटराचेर आयल्या. मलनिस्सारण प्रकल्पाच्यो वाड्यार घातिल्ल्या पायपलायनीच्या चेंबरांत गळटी लागल्या. ताका लागून प्रकल्पाचे चांचणे वेळार बांयातलें तशेंच वझऱ्यांचे उदक ओडून घेतिल्ल्यान ही परिस्थिती उप्रासल्या, व्हो प्रकल्पाच्या कामांतलो दोश आसा. तो सुरू जातगीर उदकाची व्डड समस्या उप्रासतली असो दावो ह्या वाड्या वयल्या लोकांनी केला. हळदोणचो आमदार अॅड कार्लुस फेरेरा हांणी शुक्राराक प्रकल्पाक भेट दिवंन परिस्थितीचो नियाळ घेतलो.
मलनिस्सारण प्रकल्पाचे चांचणे निमतान कामरखाजनांत घातिल्ल्या जमनीपोंदच्या पायपलायन तशेंच चेंबरांतले उदक ओडून घेवपाचें काम सुरू केल्ल्या आमच्या बायेंतले उदक उणे जालें अशें स्टेनली ब्रागांझा हाणे सांगलें. एरॉन गोम्स, नारायण नायक, जॉन लोबो हांणी मलनिस्सारणाच्या कामांत दोश आसा असो दावो केलो. चांचणेक सुरवात करचे पयलीं थळाव्या लोकांक विस्वासांत घेवपाक जाय आशिल्लें अशें तांणी सांगलें.
मलनिस्सारण प्रकल्पाचे चांचणेचो परिणाम कामरखाजनांतले सैमीक वझरे आनी बांयांचेर. हे विशीं प्रकल्पाच्या प्रभारी कडल्यान म्हायती घेवंन संबंदीत काम बंद करपाची सूचोवणी हांवें केल्या. गिमाळ्यांत अशी चांचणी घेवन सारकें न्हय अशें आमदार अॅड फेरेरा हांणी सांगलें. थळावो नगरसेवक विकास आरोलकारान प्रकल्पाच्या अधिकाऱ्या वरवी हे समस्येचेर तोडगो काडटले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
