भांगरभूंय | प्रतिनिधी
पणजी : कान्स चित्रपट महोत्सवांत आंतरराष्ट्रीय चित्रपट महोत्सव 2023 (इफ्फी) च्या पोस्टराचें अनावरण जातलें. इफ्फीचें खाशेलेपण तशेंच जायरातबाजी संबंदीच्या ट्रेलराचें लेगीत महोत्सवांत उक्तावण जातलें.
केंद्रीय म्हायती आनी प्रसारण मंत्रालया कडल्यान ही म्हायती उक्ती जाल्या. गोंय हें चित्रपट महोत्सवाचें कायमस्वरुपी केंद्र आशिल्ल्यान दर वर्सा गोंयांत इफ्फी जाता. अंदूं नोव्हेंबरांत जावपी महोत्सव हो 54वो महोत्सव आसतलो. दर वर्सा 20 नोव्हेंबराक इफ्फीचें उक्तावण जाता आनी 28 नोव्हेंबराक समारोप जाता. निविदा, चित्रपटांची निवड ही प्रक्रिया सप्टेंबरांत सुरू जाता. तरी लेगीत इफ्फीचें मार्केटींग करपा हेतान कान्स महोत्सवांत इफ्फीच्या पोस्टराचें उक्तावण जातलें.
कान्स महोत्सवांत केंद्रीय म्हायती आनी प्रसारण राज्य मंत्री डॉ. एल. मुरुगन हे भारतीय शिश्टमंडळाचे फुडारपण करतले. 16 मे ते 27 मे मेरेन हें शिश्टमंडळ कान्सांत आसतलें.
कान्स चित्रपट महोत्सव हो संवसारातलो सगल्यांत प्रतिश्ठेचो चित्रपट महोत्सव आसा. अंदूं महोत्सवांत भारतांतल्या 4 चित्रपटांक सुवात मेळ्ळ्या. ऑस्कर जैतिवंत गुणीत मोंगा आनी मानुशी चिलर हांकां कान्सांत रेड कार्पेटा वेल्यान चलपाची संद मेळटली. क्लासीक गटांत मणिपुरी चित्रपट इशानो चित्रपटाचें चित्रीकरण जातलें.
भारतीय चित्रपट महोत्सवांत 2020 सावन 75 क्रिएटिव्ह मायंडस ऑफ टुमोरो हो विभाग सुरू जाला. हाचेर कान्स महोत्सवांत चर्चासत्र जातलें. हाका लागून कान्स महोत्सवांत गोंयांत जावपी इफ्फीची जायरात लेगीत जातली.
गोंयांत 2004 वर्सा सावन सेगीत चित्रपट महोत्सव जायत आसा. आतां मेरेन गोंयांत 19 महोत्सव जाल्यात. अंदूं गोंयांत जावपी 20वो महोत्सव आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
